Violinisti Olen Çesari ka folur për një rast kur ka takuar këngëtaren e njohur Selena Gomez. I ftuar në emisionin e Rudina Magjistarit, ai tha se gjatë një udhëtimi në Itali kur ishte duke pritur çmimin “Artisti i Vitit”, takoi papritur në dhomën ngjitur të hotelit këngëtaren.
Pas një bisede të shkurtër mes tyre, këngëtarja e ka ftuar violinistin për një darkë, por ky i fundit e ka refuzuar duke i thënë se darka ishte e përfshirë në eventin ku do të merrnin pjesë.
“…Shihja nga penxherja që kishte nja 1 mijë goca që ulërinin dhe kur dal për të parë se çfarë ka ndodhur, pashë që komshia ime po ia bënte me dorë. I thashë që ajo ishte shkaktarja e kësaj rrëmuje. Ajo ngeli. Më pas më tha që do të më jepte një darkë për të ma shpërblyer shqetësimin, por unë I thashë që nuk ka gjë se darkën e kemi nga festivali dhe bëmë muhabete e gallata pastaj”, është shprehur violinisti i njohur.
