Ditën e djeshme Prokuroria e Posaçme Anti-Korrupsion sekuestroi pasuritë e botuesit dhe pronarit të Ora News, Ylli Ndroqi.
SPAK thotë se familja Ndroqi ka një nivel të pajustifikuar ekonomik dhe njofton se ka dyshim se Ndroqi nën emrin Xhemal Pasmaçiu është arrestuar dy herë, në Turqi më 1998 dhe në Itali më 2015. GJKKO ka pranuar kërkesën, dhe pasuria e tij është vënë nën sekuestro pasi dyshohet se ka si burim aktivitetin e jashtëligjshëm të Ndroqit.
Për këtë vendim, avokati Ndroqit u shpreh se ky është një sulm politik, që ka lidhje me gjyqin ndaj Erion Veliajt.
Sakaq, një deklaratë e bujshme ka ardhur ditën e sotme nga ish-drejtoresha e AMA, Endira Bushati. Kjo e fundit me anë të një statusi në Facebook shprehet se SPAK nëse do të hetojë duhet t’i shkojë deri në fund çështjes, nisur nga lindja e Ora News.
Sipas saj, mbesa 18-vjeçare e Aleksandër Frangaj, drejtori i RTV Klan, fitoi nga Këshilli Kombëtar i Radio-Televizionit në 2006 një licencë televizioni dhe pastaj brenda 1 muaji ia shiti Ylli Ndroqit për rreth 700 mijë euro.
Ish-kreu i AMA akuzon Frangajn se ka ndërhyrë për të shfuqizuar nenin 62 të ligjit të medias. Kujtojmë se sipas këtij neni: “Asnjë person fizik ose juridik, vendas ose i huaj, nuk mund të ketë më shumë se 40 për qind të kapitalit të përgjithshëm të shoqërisë aksionare, që zotëron një licencë kombëtare për transmetimet audio ose një licencë kombëtare të transmetimit audioviziv”.
Heqja e këtij kufizimi për përqindjen e aksioneve që mund të mbajë një individ në media mund të sjellë ndryshime aksionerët e tregut mediatik në vend.
Po ashtu, ajo kërkon të hetojë edhe shitjen e ABC News, për të cilin thotë se si një program/kanal pjesë e një licence kombëtare, i cili sipas ligjit shqiptar nuk mund të shitet më vete.
Nëse SPAK do të hetojë, le t’i shkojë deri në fund….
Le të hetojë si lindi Ora News….
Mbesa 18 vjeç e A. Frangaj “fitoi” nga KKRT në 2006 një licencë televizioni….. dhe pastaj brenda 1 muaji ia shiti Ylli Ndroqit për rreth 700 mijë euro….
Le të hetojë se si A. Frangaj, pasi nuk la gur majtas e djathtas pa lëvizur për të shfuqizuar nenin 62 të ligjit të medias, kapi Gjykatën Kushtetuese në 2016 që e shpalli nenin antikushtetues….
Le t’i hetojë sesi këta Gjyqtarë Kushtetues, në kundërshtim me rekomandimet e BE, KiE dhe OSBE , e shpallën këtë nen antikushtetues, nen që garantonte që licencat kombëtare të mos përqendroheshin në një familje….
Le të hetojë AMAn, që në kundërshtim mesa rekomandonte gjithë Evropa, ishte zyrtarisht pro shfuqizimit të këtij neni….
Le të hetojë shitjen e ABC News, një program/kanal pjesë e një licence kombëtare….i cili sipas ligjit shqiptar nuk mund të shitet më vete…
Le të hetojë gjyqtarët, prokurorët, anëtarët e AMAs që në kundërshtim flagrant me ligjin, mundësuan që me 4 vota nga 5 që kërkonte ligji, dhanë me vendime gjykatash 4 nga 5 licencat kombëtare televizive për familjet Frangaj dhe Hoxha….
Le të hetohen Taulant Balla dhe çdo deputet i çdo partie në Komisionin e Medias që kishin detyrim ligjor të rregullonin nenin 62 të ligjit të medias, pas vendimit të GJK, dhe kanë 4 vjet që nuk bëjnë asgjë….
Të hetohen ideatorët, regjisorët, prokurorët, gjyqtarët që me vendimet ndaj Agon Channel, bënë shqiptarët të paguajnë 110 milionë euro….
Le të hetohen të gjithë e gjithçka….
Kur SPAK të hetojë këto, mund të themi se diçka po ndodh në Shqipëri….
Deri atëherë….
Asgjë e re nga fronti i (Ri) Lindjes……
