Edhe pse ndodhet pas hekurave duke vuajtur një dënim me pesë vite burg, ish-Presidenti i Francës Nicolas Sarkozy vazhdon të gëzojë një mbështetje të konsiderueshme nga qytetarët francezë. Pamje të reja që po qarkullojnë në internet tregojnë qartë se karizma dhe ndikimi i tij politik nuk janë zbehur, pavarësisht situatës së tij aktuale.
Në një video të publikuar në llogarinë e tij personale në X (ish-Twitter), shihet një punonjës i institucionit ku ai po vuan dënimin, teksa zbraz para kamerës një qese të madhe të mbushur me letra dhe kartolina të dërguara nga njerëz nga e gjithë Franca.
Në to, mbështetësit i shkruajnë Sarkozy-t fjalë inkurajuese, duke e nxitur të ruajë forcën dhe vendosmërinë në këtë periudhë të vështirë. Disa letra mbajnë mbishkrime të thjeshta, si “Ji i guximshëm”, ndërsa të tjera tregojnë një lidhje emocionale edhe më të thellë, përfshirë mesazhe nga fëmijë, karta të vizatuara me dorë dhe fjalë mirënjohjeje.
Videoja tregon gjithashtu se, krahas letrave, Sarkozy merr dhjetëra libra çdo ditë, të cilat mbështetësit ia dërgojnë si shenjë qëndrueshmërie, kulture dhe vazhdimësie mendimi edhe në izolim. Kjo valë e madhe solidariteti shfaqet në një moment ku figura e Sarkozy-t vazhdon të ndajë opinionet publike në Francë. Megjithatë, ndër ata që e kanë admiruar dikur dhe vazhdojnë ta vlerësojnë, ai mbetet një simbol i energjisë dhe vendosmërisë politike.
Reagimi i Sarkozy-t: “Fundi i historisë nuk është shkruar ende”
Krahas videos, ish-Presidenti ka publikuar edhe një mesazh falënderimi:
“Faleminderit nga thellësia e zemrës për mobilizimin tuaj! Fundi i historisë nuk është shkruar ende…”
Ky reagim është interpretuar nga shumë analistë si një shenjë se Sarkozy nuk e sheh veten të përfunduar politikisht, pavarësisht çështjeve ligjore që po e ndjekin prej vitesh.
Nicolas Sarkozy, i cili drejtoi Francën nga viti 2007 deri në 2012, mbetet një prej presidentëve më të diskutuar të Republikës. Stili i tij i drejtpërdrejtë, dinamizmi dhe prania në skenën publike kanë krijuar një bazë të qëndrueshme mbështetësish që nuk është zhdukur as tani që ai ndodhet pas hekurave. Ky mbështet që vazhdon t’i arrijë çdo ditë në formë letre, është simbol i një lidershipi që për disa qytetarë nuk shuhet, pavarësisht fatit politik apo ligjor.
Merci du fond du cœur pour votre mobilisation ✉️ ! La fin de l’histoire n’est pas écrite… pic.twitter.com/L2eIRoWBvv
— Nicolas Sarkozy (@NicolasSarkozy) November 6, 2025
