E dashur psikologe: Përshëndetje! Unë që po ju shkruaj jam një djalë 17 vjeç dhe u bë gati nja një javë që kur fle shikoj ëndrra të këqija çdo natë. Kam frikë të fle dhe më e çuditshmja është që nuk e kuptoj pse shikoj ëndrra të tilla (me vrasje dhe të pakuptimta). Më datë 4 bëra 17 vjeç. Asgjë tjetër nuk ka ndryshuar në jetën time kohët e fundit.
Përshëndetje! Faleminderit që më shkrove. Psikologët janë përpjekur prej kohësh të shpjegojnë ëndrrat. Si fillim, duhet të dini se ëndrrat janë simbolike dhe ajo që ne shohim në ëndërr mund të mos ketë lidhje me realitetin ose mund të mos ndodhë në realitet (edhe pse ndonjëherë mund të shohim ëndrra që realizohen).
Të kalojmë te ëndrra juaj. Ëndrrat e frikshme shpesh janë parë si një reagim normal ndaj stresit. Ato na ndihmojnë të çlirojmë stresin dhe emocionet e forta që përjetojmë gjatë ditës. Keni shkruar se shihni përnatë ëndrra që të frikshme prej një jave, qëkur mbushët 17. Kjo mund të na thotë që po përjetoni emocione të forta, që përkojnë me ditëlindjen tuaj të 17-të. Periudha e adoleshencës është një kohë ndryshimesh dhe përjetimesh emocionale të mëdha. Ndonjëherë, ëndrrat e frikshme i nxjerrin jashtë ndjenjat e frikës dhe ankthit.
Duke ju lexuar me vëmendje, intuita mund të na drejtojë edhe në dy drejtime të tjera. Së pari, mendja juaj po përpiqet t’ju tregojë se diçka me rëndësi po ndodh në jetën tuaj. Së dyti, vrasja në ëndërr mund të simbolizojë përfundimin e diçkaje. Mirëpo, duhen marrë parasysh shumë gjëra. Për shembull, a përsëritet e njëjta ëndërr çdo natë? Nëse ëndrra përsëritet do të thotë që ju ende nuk i keni zbuluar shkaktarët e stresit në jetën tuaj apo të keni zgjidhur problemet.
Edhe pse këto ëndrra ju shkaktojnë ndjenja të forta, qetësohuni: ëndrrat e këqija nuk janë të vërteta dhe nuk mund t’j dëmtojnë. Kur ne flemë, truri ynë vazhdon të punojë. Për të ndihmuar veten që të shihni më pak nga këto ëndrra, mund të bëni disa ndryshime në jetën tuaj: të zbuloni nëse keni shqetësime që ua shkaktojnë, të punoni për të ulur stresin dhe të përmirësoni gjumin. Mund të ketë shumë shkaktarë psikologjikë të ëndrrave të frikshme. Ka njerëz që mund të kenë simptoma të një shqetësimi të shëndetit mendor, por ato duhen vlerësuar nga afër. Ju përshëndes!
*Psikologe klinike Lediona Braho
Për Iconstyle.al
