Thonë që mund të kuptosh shumë për një person në momentin që shikon çfarë këpucësh ka veshur. Ndaj disa persona (përfshirë edhe ne të “Iconstyle.al”) janë të fiksuar të shohin se çfarë këpucësh ka veshur ajo vajza apo ai djali që sapo njohët, jo më për këpucët që veshin femrat e njohura shqiptare, që kanë pushtuar “Instagram”-in.
Më 14 nëntor ne bëmë një analizë të veshjes nga koka te këmbët të Lori Hoxhës dhe rezultoi se kishte shpenzuar të paktën 1200 euro. Gjithsesi sytë na mbetën te sandalet “Gucci”, jo pa qëllim.
Me siguri i keni parë fillimisht në pasarelë gjatë Javës së Modës. Sandalet me kristale i përkasin koleksionit vjeshtë/dimër 2017-2018, por nuk i keni fiksuar pasi modelet i kishin kombinuar me çorape me dizajnë.
Dantella minimaliste është e zbukuruar me kristale shkëlqyese, të cilat qëndrojnë në tre shiritat në pjesën e përparme.
Ndërsa materiali i përdorur është lëkura e dhisë, pjesa e shollës është në ngjyrë rozë dhe kanë një çmim prej 815 euro.
Lori kishte zgjedhur t’i kombinonte me një kostum kadife me shkëlqim të zi.
Në fakt sandalet “Gucci” ia morën zemrën edhe dy prej të famshmeve shqiptare: Erisa Kaçupit dhe Nora Istrefit.
Fashionistja Erisa Kaçupi ka krijuar një stil veshjeje, që mund të themi pa ngurruar se i përshtatet çdo femre shqiptare. Në dy evente të ndryshme në muajin dhjetor, Erisa i kombinoi sandalet me fustane.
Fillimisht zgjodhi një fustan të gjerë rozë “pastel” me shkëlqim.
Ndërsa në foton e dytë të publikuar shfaqet me një fustan të mbuluar me xixa gri.
E fundit që u dallua me sandalet “Gucci” ishte Nora Istrefi. Këngëtarja zgjodhi t’i kombinonte në një veshje akoma më klasike, një fustan të gjatë të zi me një të çarë.
E veshur me fustanin e zi, pelushin e bardhë dhe sandalet “Gucci”, Nora performoi para fansave.
Cili kombinim i afrohet më shumë stilit tuaj?
