Presidenti francez, Emmanuel Macron ka folur në gjuhën shqipe gjatë vizitës së tij në vendin tonë. Në fund të fjalimit që mbajti në nisje të darkës së shtruar për në pallatin e Brigadave, Macron theksoi se gotën e tij po e ngre për vizionin që ka Franca për Shqipërinë. Po ashtu ai shtoi në fjalët e tij ‘Rroftë Shqipëria’ dhe miqësia franko-shqiptare.
“Për ta mbyllur po e ngre gotën time për këtë vizion entuziast që kemi ne për vendin tuaj. Për Shqipërinë, popullin shqiptar, për lidhjet e ngushta dhe kaq të veçanta që na bashkojnë, për Evropën. Rroftë Shqipëria, rroftë miqësia franko-shqiptare”, tha Macron.
Samiti u zhvillua për herë të parë jashtë kufijve të BE-së dhe organizimi iu besua qeverisë shqiptare. Në orën 12:00 nisi sesionin i parë, ku u diskutua mbi Integrimin e Rajonit në Tregun Unik dhe Përmirësimi i Konvergjencës me BE. Në sesionin e dytë u firmos marrëveshja ndërmjet liderëve të Ballkanin Perëndimor, për njohjen e kualifikimeve profesionale të infermierëve, veterinerëve, farmacistëve dhe mamive në kontekstin e marrëveshjes së tregtisë së lirë të Evropës Qendrore, (CEFTA).
