Tarifa e “Roaming”-ut nënkupton telekomunikimin dhe shërbimin që qytetarët e përdorin në një shtet tjetër, nga një qendër e operatorit të telefonisë së lëvizshme.
Kompanitë celulare në Shqipëri prej vitesh kanë gjetur rastin që të abuzojnë edhe më këto tarifa që janë shumëfish më të larta sesa ato që përdoren për telekomunikim në vendet fqinje.
Mirëpo së fundmi duket se ata që përdorin “Roaming” do të shohin pakëz dritë në fund të tunelit, pasi sot (6 dhjetor) është nënshkruar marrëveshja e parë e samitit të Be-Ballkanit Perëndimor që po mbahet në Tiranë, marrëveshja “Roaming” e cila synon uljen e tarifave.
Kjo marrëveshje i hap rrugë nisjes së procesit për heqjen e tarifës roaming mes vendeve të Bashkimit Evropian dhe Ballkanit Perëndimor.
Ky lajm i rëndësishëm vjen pas negociatash të gjata mes Komisionit Europian dhe RCC-së së drejtuar nga Sekretarja e Përgjithshme, Majlinda Breg.
Por kur hyn në fuqi kjo deklaratë? Marrëveshja e “Roaming” me tarifa të ulura do të aplikohet nga 1 tetori 2023.
Kjo çështje është trajtuar nga “iconstyle.al” që në vitin 2020, ku pasi konstatuam pakënaqësinë në masë të qytetarëve mbi këtë çështje, “iconstyle.al” realizoi një sondazh, nga i cili konstatuam shkelje ligjore të shumta për të cilat duhet mbajtur përgjegjësitë ligjore përkatëse.
Nga ky sondazh i bërë më herët “vendin e parë’ si kompania me më shumë pakënaqësi e mban Vodafone.
Pikë së pari, paketat “roaming” në vendin tonë janë shumë të shtrenjta, krahasuar jo vetëm me vendet fqinje e ato europiane, por edhe me shërbimet që ofrojnë.
37% e pjesëmarrësve në sondazh u shprehen se ofertat ‘roaming’ janë shumë të shtrenjta, kurse 29% u shprehen se nuk i përdorin ato sepse nuk ia vlejnë.
Ndërkohë, 21% e pjesëmarrësve thanë se shpeshherë këto paketa i lënë në mes të rrugës dhe vetëm 13% e tyre u shprehen se janë në rregull.
