Zëvendësministrja e Shëndetësisë, Mira Rakacolli ka bërë me dije se numri i të infektuarve në Shqipëri do të ishte shumëfish më i madh se aktuali, nëse nuk do të ishin marrë masat e ashpra kufizuese.
Në një intervistë për Report.tv ajo u shpreh se janë bërë disa llogaritje në bazë të vendeve të tjera, dhe është menduar se numri mund të arrinte deri në 18 mijë.
“Janë bërë kalkulime të ndryshme. Ky ishte një virus i panjohur, nuk dihej si do bëhej shpërndarje, por nisur nga modelet e tjera në vendet e tjra, është menduar se mund të kishim edhe 18 mijë të sëmurë”, tha zv.ministrja e Shëndetësisë.
E pyetur për sezonin e plazhit, Rakacolli tha se nuk është në gjendje të bëjë parashikime a do të duhet të nisë, por në këtë ditë të shenjtë për besimtarët ortodoksë, ajo ndau një urim.
“Do isha shumë e lumtur të isha në gjendje unë të bëja të tilla parashikime në kohë. E uroj me gjithë shpirt të ndodhë, dhe shpresoj që ky urim në ditë Pashke, të bëhet realitet”, përfundoi ajo.
