Ministrja e Shëndetësisë, Ogerta Manastirliu ka treguar se janë 14 persona që kanë pasur kontakte me dy të infektuarit me Koronavirus në Shqipëri dhe aktualisht janë izoluar.
Manastirliu ka dhënë shifrat e analizave të kryera për Koronavirusin në vend. Në një konferencë për shtyp, ministrja tha se kanë testuar 65 raste dhe 2 prej tyre rezultuan pozitivë.
Aktualisht po priten analizat e 14 personave, pasi kanë pasur kontakte me 2 të infektuarit. Ministrja theksoi se janë marrë masat dhe janë gati planet e veprimit.
“Ne kemi të gjitha planet e gatshme, planet e veprimit janë dinamike që ndryshojnë nga momenti në moment, të cilat janë të parapërgatitura. Kemi pasur kohën për të bërë të gjitha trajnimet përkatëse. Të keni besim te personeli ynë mjekësor që nuk është hera e parë që përballen me këto situata.
Do të doja që të informoja edhe njëherë për të gjitha masat që janë ndërmarrë, kemi vendosur mbylljen e institucioneve arsimore. Mbylljen e aktiviteteve publike, deri në datë 3 prill. Anulimin e grumbullimin e tubimeve masive. Ndalimin e eksporteve për barnave. Në ambientet e shërbimeve do të ndalohet hyrja e shoqëruesve”, deklaroi Manastirliu.
Gjithashtu, Shefja e Departamentit te Epidemiologjisë dhe Kontrollit të Sëmundjeve Infektive në Institutin e Shëndetit Publik, Silva Bino, ka bërë me dije se sot janë gjurmuar 24 kontakte që janë vetëkarantinuar.
“Gjurmuam 8 kontaktet e ngushta që mbrëmë në darkë, pas daljes së ekzaminimeve, janë marrë mostrat që janë në proces, sot janë gjurmuar 24 kontakte që janë vetëkarantinuar, i kontrolluar, po ju merren mostrat dhe janë këshilluar lidhur me to.
Kontakte qe ne i quajmë kontaktet e dyta për te qenë sa më të sigurt, ne jemi në fazën që të kufizojmë sa të mundemi përhapjen e sëmundjes dhe është shumë e rëndësishme bashkëpunimi i qytetarëve, pacientët janë treguar korrektë lidhur me identifikimin e kontakteve dhe më pas kemi bërë gjurmimin”- është shprehur Bino.
I riu 28-vjeçar që importoi Koronavirusin nga Italia, nuk është kontrolluar në pikën kufirtare të Muriqanit, pasi sipas mjekes që është pjesë e grupit të kontrollit në këtë pikë doganore, ai nuk vinte nga një zonë e kuqe.
Nëse ai do të ishte kontrolluar që në momentin e hyrjes në kufi, ndoshta do të kishte kursyer përhapjen e virusit te babai i tij dhe me gjasë të 14 personat e tjerë!
/Abcnews.al
