Dua Lipa do të jetë në Prishtinë për të mbajtur koncertin e saj të parë në atdhe më 9 gusht. Një ditë më pas, më 10 gusht, këngëtarja nga Kosova do të mbajë koncertin e radhës në Tiranë në sheshin “Nënë Tereza”.
Ndërsa biletat për ta ndjekur Duan në kryeqytetin shqiptar ende nuk kanë dalë në treg, për në Prishtinë do të jenë në dispozicion nga 30 korriku.
Për koncertin e organizuar nga komuna e Prishtinës parashikohet të harxhohen rreth 49,990 euro. Në kontratën për tender shihet se, për gjithë organizimin e koncertit do të kujdeset agjencia që është nën udhëheqjen e Dukagjin Lipës. Ky i fundit parashihet që për shtatë ditë ta bëjë organizimin e gjithë eventit.
Në këtë shumë përshkruhet deri në detaje madje stolitë dhe grimin për stafin e këngëtares i cili pritet të jetë i pranishëm në Kosovë. Ndërsa çmimet e biletave variojnë nga 10 – 15 euro.
