Shumica e njerëzve kalojnë çdo sekondë të ditës së tyre të punës duke iu përmbajtur axhendës dhe listës së tyre të detyrave – duke marrë pjesë në takime, duke iu përgjigjur email-eve, duke u përpjekur për të kapur afatet.
Kjo e bën të vështirë planifikimin e një hapësire kohe për të eksploruar idetë që na interesojnë ose për të mësuar aftësi të reja. Dhe, në një kohë kur është e pamundur të parashikohet se si do të evoluojnë llojet e punëve dhe industritë e tanishme, zgjerimi i rangut tonë të ekspertizës është ajo që na jep një avantazh konkurrues në planin afatgjatë.
Si mund të planifikojmë kohën për të qenë në avantazh në të ardhmen?
Për këtë vjen në ndihmë rregulli “20% i kohës” i Google, një koncept i bërë popullor kur Google u bë publik në vitin 2004.
“Ne nxisim punonjësit tanë, përveç projekteve të tyre të rregullta, të shpenzojnë 20% të kohës së tyre duke punuar në atë fushë që ata mendojnë se do të sjellë më shumë përfitime për Google,” shkruan themeluesit Sergey Brin dhe Larry Page në letrën e tyre kur Google u bë publik. “Kjo i fuqizon ata që të bëhen më krijues dhe inovativë. Shumë nga arritjet tona më të rëndësishme [si AdSense dhe Google News] kanë ndodhur në këtë mënyrë.”
Sigurisht, kjo është më e lehtë të thuhet sesa të bëhet, por askush nuk do t’jua ofrojë mundësitë e zhvillimit në një pjatë; ju duhet t’i kërkoni ato në mënyrë proaktive.
Ja se si:
- Përcaktoni qartë se ҫfarë dëshironi të mësoni
Gjëja kryesore këtu është që të jeni sa më specifik që të jetë e mundur për atë aftësi që dëshironi të përvetësoni. Në vend që të bëni 10 kurse në 10 fusha të ndryshme, zhvilloni ekspertizën tuaj në vetëm një prej tyre.
Me kalimin e kohës do të vini re përmirësim më të shpejtë, i cili do t’ju motivojë të vazhdoni përpara. Ekspertiza e mirëfilltë – për shembull, në shkrimin e teksteve për reklamime dhe shitje ose programimi në një gjuhë të re kompjuteri – në fund të fundit mund të rrisë vlerën tuaj për punëdhënësin ose mund të sjellë një burim dytësor të ardhurash për ju.
- Fitoni – edhe nëse humbisni
Kjo është mënyra më e mirë për t’u siguruar që 20% i kohës tuaj të mos shkojë dëm. Kuptoni se cili është përfitimi minimal që do të merrni nga një situatë ose mundësi e caktuar, edhe nëse asgjë tjetër nuk po shkon në drejtimin e duhur.
Kjo mund të ketë të bëjë me ekspozimin ndaj një industrie të re, krijimin e lidhjeve në një rajon tjetër ose praktikimin e aftësive të vlefshme, si për shembull të folurit në publik dhe komunikimi i qartë.
Nëse edhe vetëm rezultati minimal tingëllon intrigues, atëherë projekti ka të ngjarë të jetë një bast i mirë për ju.
- Jini elastik dhe të përkushtuar
Mbrojtja e “20% të kohës” është si të mbani një dietë: është mirë të jeni të disiplinuar, por ndonjëherë duhet t’i përshtasni rregullat dhe të bëheni më fleksibël.
Emergjencat e klientëve ose takimet e improvizuara të stafit mund t’ju pengojnë të shpenzoni kohën që kishit planifikuar në kalendarin tuaj, por nuk ka problem – për sa kohë që ju vendosni ta riplanifikoni atë kohë dhe të vazhdoni të mbani angazhimin tuaj.
Çështja nuk është se ju duhet të zbatoni “rregullin 20%” të kohës tuaj çdo të enjte pasdite; çështja është ta zbatoni atë, pikë.
- Gjeni mënyra për ta bërë atë sa më argëtuese
Duhet shumë përpjekje për të vazhduar rregullisht me zbatimin e “rregullit 20%” të kohës tuaj dhe bëhet akoma më e vështirë ta ruani atë vullnet nëse gjithçka që po bëni lidhet thjesht me detyra shtëpie të pafundme dhe seanca rigoroze trajnimi.
Gjithsesi, mund t’ju nevojitet një dozë e fortë periodike e atij vullneti, sepse në çdo disiplinë, ka disa elementë sfidues që duhet t’i mësoni. Por nëse e vetmja gjë që po bëni janë detyrat e vështira, mund të mërziteni ose të frustoheni dhe të dëshironi të hiqni dorë.
Ka shumë mënyra për ta bërë “rregullin 20%” të kohës suaj më të bukur, si për shembull dëgjimi i librave audio gjatë një shëtitjeje, intervistat informuese me kolegët gjatë një dreke të këndshme ose ndjekja e një kursi me një mikun tuaj.
- Mendoni për dekadat e ardhshme
Ashtu si investimet në bursë, kur investoni kohë në projektet tuaja sipas “rregullit 20%”, fuqia e interesit të përbërë në vite është shumë e madhë. Ajo që në fillim duket e vogël dhe e pakuptimtë, mund t’ju mundësojë të krijoni një distancë të madhe midis jush dhe konkurrentëve tuaj.
Dhurata e “rregullit 20%”, veçanërisht kur mendojmë për dekadat e ardhshme, është se edhe nëse vendosim përfundimisht të ndryshojmë planet ose të marrim një drejtim tjetër, hapat e vegjël që ndërmarrim tani fitojnë vlerë me kalimin e kohës dhe na japin më shumë opsione në të ardhmen. / CNBC
