Sot, protestës kundër rritjes së çmimeve i janë bashkuar qytetarë të ndryshëm të vendit, që sa vijnë e shtohen. Nënë Liza, protestuese gjithashtu e 5 Majit, ka bërë thirrje kundër rritjes së çmimeve.
Ajo theksoi se pensioni që marrin nuk mjafton as për t’u ushqyer, jo më për të përmbushur nevoja të tjera.
“Pensionet nuk dalin për bukë. Kryeministri që është burrë t’i dalë përpara këtij populli dhe t’i japin përgjigje këtij populli. Ukraina është në Shqipëri, Rusia po i bien Ukrainës, por ne na ra shteti jonë, na ra në shtëpinë tonë…Shtëpitë tona janë shkatërruar, Ukraina është në Shqipëri.”, tha ajo.
Mes protestuesëve ka ngritur zërin edhe një pensioniste, e cila tha me ironi se ka ardhur për të bërë një vepër bamirësie, pasi pensionin e saj do t’ia falë bashkëshortes së kryeministrit.
“Kam ardhur në protestë të bëj një vepër bamirësie. 2 milionë lekë mua më duhen për analiza, ilaçe dhe vizita. Pensionin e kam 70 mijë lekë. Kam ardhur t’i fal pensionin tim Linda Ramës. Se unë me pension as nuk ha e as nuk pi, as nuk laj ujë e as nuk laj drita”, tha protestuesja pensioniste.
Një vajzë e vogël, banore e Kodrës së Priftit, i ka kërkuar kryeministrit Rama uljen e taksave dhe rritjen e rrogave. Ajo tha se përveç rritjes së çmimeve do t’i prishin dhe shtëpitë.
