Për shkak të situatës nga pandemia Covid-19 dhe shtimit të rasteve të reja, qeveria vendosi që ky vit i ri shkollor të alternohet me disa orë nëpër klasa dhe më pas me disa leksione nga shtëpitë e tyre nëpërmjet RTSH Shkollës.
Mirëpo bazuar në ankesat e nxënësve dhe në kritikat e ekspertëve të arsimit dhe pedagogëve, rezulton se mësimdhënia përmes RTSH Shkollës, është në një performancë të dobët, jokronologjike dhe jo efektive.
Kjo gjë vjen pasi shpesh mësuesit të cilët japin lëndët në bazë të planprogramit, të caktuar në oraret përkatëse, janë shpesh të pakualifikuar dhe të papërshtatshëm në transmetimin e mësimit nëpërmjet kësaj metode të re të përshtatur nga situata e pandemisë.
Sikur të mos mjaftonte kjo, qeveria ka vendosur të japë 30 milionë lekë për RTSH-në vitin që vjen, ndërsa vlen të përmendet këtu se ky fond është vetëm një pjesë e përfitimit.
Theksojmë se përveç taksës së përhershme që familjet shqiptare paguajnë për RTSH-në, këtë vit taksapaguesit do të paguajnë dhe disa shpenzime shtesë.
Atëherë ku po shkojnë këto para?
Disa nga faktorët që të bëjnë të mendosh dështimin e kësaj platforme, janë mësimdhënia në një cilësi relativisht të dobët, mospërputhja e temave që shpjegohen nga RTSH Shkolla, me kurrikulat mësimore që ndjekin shkollat në të gjithë territorin e vendit, si dhe mosmbulimi i të gjithë territorit deri në zonat e thella, të transmetimit të emisionit RTSH Shkolla, zona të cilat shpeshherë nuk kanë sinjal dhe mundësi për të ndjekur leksionet nga televizori.
Duke parë këto boshllëqe, duket sikur metodat e përdorura nga Ministria e Arsimit janë të dështuara dhe këtë e thonë edhe shumë ekspertë arsimi, pedagogë, mësues dhe nxënës.
Për ekspertin e arsimit Ndriçim Mehmeti, ministria nuk ka një plan real dhe efektiv për shkollat dhe sipas tij, viti shkollor i kaluar ka qenë një dështim total.
Për Mehmetin, vetëm me një investim real me një fond prej rreth 6-10 milionë euro, mund të realizohet një vit efektiv shkollor, duke tejkaluar pandeminë.
“Ministrja thotë se mësimi do të bëhet nëpërmjet një kanali që quhet RTSH shkolla. Ne kemi mësues sa të duash, por nuk kemi vullnet. Që nesër, ke listën e mësuesve që janë diku 5000-6000. Po ashtu, duhen edhe nja 1000 mësues për nxënësit me aftësi të veçanta.
Me një investim me 6-10 milionë euro mund të realizohet një vit shumë të mirë shkollor duke tejkaluar pandeminë dhe të mbulohen të gjitha problematikat që u shkaktuan nga muaji mars deri më sot”, ka deklaruar eksperti i arsimit në një intervistë televizive.
Nga ana tjetër mësuesit kanë deklaruar se në lidhje me vendimet e reja që prekin sistemin shkollor dhe vetë stafet pedagogjike e nxënësit, Komiteti Teknik i Ekspertëve nuk u konsultua fare me ta.
Edhe për pedagogun e njohur, Artan Fuga, mësimi në RTSH Shkolla dhe ai online është një plan i pa menduar mirë.
Nëpërmjet një postimi në rrjetin social Facebook, akademiku ka kritikuar emisionin e RTSH Shkollës. Sipas tij mësuesit e përzgjedhur në këtë emision, nuk janë të kualifikuar për të dhënë mësim në atë formë, pasi po ua përcjellin nxënësve informacionin në mënyrë gabuar.
Postimi i profesorit Artan Fuga:
Nuk bëhet kështu shkolla në televizion!
Ka disa ditë që më ka tërhequr vëmendjen emisioni për shkollën në televizionin publik shqiptar. Gjoja si zëvendësues ose ndihmës për mësimin në klasë në kohë pandemie.
Dje pata pak kohë ta ndiqja me kujdes disa minuta, sepse një i afërt më tha : Ore, shih se çfarë bëhet! Ka gallatë!
Pëllcet qeliza – thotë mësuesja!
Ishte një lemeri, një banalitet, një mediokritet i paparë! Më mirë pa mësim fare sesa me ato paçavure!
Ishte tema e mësimit në histori: Monarkia franceze!
Nuk kuptohej nëse atë mësim e kishte çertifikuar Ministria e arsimit apo ishte një shoë e televizionit publik, një koncert variete komike për të na bërë të qeshim.
Uroj që nxënësit të mos e kenë marrë seriozisht dhe t’i kenë kthyer kurrizin! Më mirë pa shkollë sesa me atë lloj mësimi të turpshëm, ku me taksat e qytetarëve disa institucione tallen.
Nuk e ka fajin prezantuesja, së cilës i kërkoj falje, por nuk kuptohej se për cilin cikël ishte mësimi.
Ishte mësim historie, por nuk kishte asgjë historie, më shumë një sociologji banale e feudalizmit, trajtuar si mos më keq. O Zot!
Jepej një citim, por pa pikë reference. Nuk tregohej se në cilat tekste mbështetej mësimi. Asnjë datë veç një gjë që kishte ndodhur si Traktat i Verdunit andej nga shekulli i nëntë. Asnjë shpjegim për këtë.
Asnjë datë tjetër, asnjë ngjarje madhore e përmendur, asnjë personazh veç legjendës të Zhanë d’Arkës që nuk kuptohej se çfarë ishte. Lufta 100 vjecare me Anglinë nuk kuptohej se përse u bë dhe çfarë lidhje kishte me Monarkinë.
Ngatërrohej koncepti mbret i frankëve me atë të mbretit dhe monarkisë të Francës. Veç Hygë Kapetit, sikur nuk kishte as Luigj të 14, as të 15, as të 16.
Nga monarkia hidhej në arsyetime banale për feudalizmin ku feudalët konsideroheshin rivalë të mbretit, i cili gjithë kohën paskësh qenë solidar me byrgerët e qyteteve.
Histori pa histori, monarkia paraqitej e njejtë në të gjitha kohët. A thua se Sharlëmanja nuk kishte ekzistuar fare dhe zëvendësohej me një personazh gjysmë mitologjik si Zhana.
U premtua se do të flitej për asamblenë kushtetuese, por asgjë nga historia e saj. Dukej si aneks i mbretit, siç ka qeveria jonë Kuvendin. Asnjë fjalë për Kishën Katolike dhe pushtetin e saj.
A thua se nuk kishte pasur iluministë! Nuk kishte pasur As Volter, as Danton, as Marat, asgjë prej gjëje!
U premtua se do të trajtoheshin dallimet mes monarkisë franceze dhe angleze, por asgjë nuk u tha. A thua se kanë qenë dy copa guri të palëvizshëm në mal që krahasohen me dy fjalë.
Nuk bëhej fjalë të lexohej ndonjë dokument historik, të jepeshin pjesë të ndonjë dokumentari, të sugjeroheshin romane a lexime, të jepej me skemë historia dhe gjenealogjia e ngjarjeve historike, të tregohej shtrirja gjeografike në kohëra të ndryshme, të tregoheshin mekanizmat e oborrit, të taksave, të ushtrisë, të kështjellave të mëdha.
o Zot, thashë, këta nuk heqin dorë nga Turi, këta nuk kanë dinjitet, nuk dinë se bëjnë krime.
Cfarë bën televizioni publik shqiptar? Pse pranon të tilla surrogato, pse bëhet palë me këto emisione ku banaliteti dhe mediokriteti të bëjnë të vjellësh! Kush vazhdon të tallet me arsimin e rinisë shqiptare edhe pasi dikush që u tall disa vjet më në fund u zbyth.
Në televizion ne po shohim aktin e parë të dramës që prodhon Turin në maturë.
Turi maturi!
Turi imaturi!
Turi aguridhja!
Pasi bëhen këto lloj mësimesh sigurisht në fund pyetjet do të jenë:
A e ke parë filmin me D’Artanjanin?
Kush aktor e ka luajtur rolin e tij në filmin Tre Moskjeterët?
Lutem jepini fund këtij banaliteti!
Këtij maskaralliku televiziv!
Këtij bashkimi midis banalitetit pedagogjik me banalitetin televiziv!/Iconstyle.al/
