Pas 3 ditësh me raste pozitive të qëndrueshme me koronavirus, janë rritur ndjeshëm të prekurit në 24 orët e fundit, me 18 të infektuar sot.
Ministria e Shëndetësisë bëri me dije se nga rastet e reja, 11 raste janë në Tiranë, 4 raste në Krujë, 2 në Berat dhe 1 në Durrës.
Deri më sot janë konfirmuar pozitivë me COVID-19 në të gjithë vendin 898 qytetarë, ndërsa 77% e të prekurve tashmë janë të shëruar.
Në të gjithë vendin aktualisht janë 173 persona aktivë me COVID-19, kryesisht ne Tiranë, Krujë, Shkodër, Kamëz.
Situata në spitale paraqitet e qëndrueshme prej ditësh. Aktualisht në dy spitalet COVID janë të shtruar 19 pacientë dhe vetëm 3 prej tyre janë në terapi intensive.
Me pak se 11% e të prekurve aktivë po marrin trajtim në spitalet Covid, pjesa tjetër ndiqet nga mjeku i familjes.
Situata me pandeminë në mbarë botën
Deri më tani, në mbarë botën, më shumë se 4.34 milionë njerëz janë infektuar dhe të paktën 296,000 kanë vdekur nga COVID-19, sipas Universitetit Johns Hopkins. Rreth 1.6 milionë njerëz janë rikuperuar.
Numri i rasteve me koronavirus në Rusi ka tejkaluar shifrën 250,000, por çdo ditë infeksionet e reja kanë rënë nën 10,000 për herë të parë në gati dy javë.
Autoritetet amerikane kanë akuzuar hakerat të lidhura me Kinën për ndërhyrje të jashtëligjshme mbi organizatat që kryejnë kërkime mbi infeksionin e koronavirusit.
Kombet e Bashkuara parashikojnë se pandemia do të shtyjë rreth 34.3 milionë njerëz në varfëri ekstreme kryesisht në Afrikë.
Organizata Botërore e Shëndetit ka thënë se investime të konsiderueshme janë të nevojshme për të shmangur një krizë të shëndetit mendor pas shpërthimit të koronavirusit, duke ngritur shqetësimin për ndikimin e pandemisë në mirëqenien psikologjike të njerëzve.
Brazili është bërë vendi i gjashtë më i goditur në botë me koronavirus, pas një rekordi të përditshëm prej 11,385 rasteve të reja dhe 749 vdekjeve të reja.
Shkollat janë rihapur në Finlandë pas tetë javësh bllokimi nga koronavirusi, pavarësisht paralajmërimeve nga sindikata e mësuesve, se ambienti mund të mos jetë plotësisht i sigurt për stafin ose fëmijët.
/Iconstyle.al
