Koronavirusi mund të ndryshojë edhe ceremonitë mortore.
Shoqata Kombëtare e Drejtuesve të Funeralëve në Britaninë e Madhe (NAFD), tha për “SKY”, se po merret në konsideratë mundësia e zhvillimit të funeraleve online.
NAFD bën me dije, se ka nisur bisedimet me qeverinë dhe autoritetet lokale, që në rast se koronavirusi shpallet si pandemic globale, të ndryshojnë edhe ceremonitë mortore.
Ata shtojnë gjithashtu se edhe funeralet do të përshtaten, nëse qeveria vendos të ndalojë frekuentimin e ambjenteve publike.
“Për të mbështetur qeverinë dhe autoritetet lokale në menaxhimin e situatës, drejtuesit e funeralebe do të ndihmojnë familjet, që të gjejnë mënyra për t’i dhënë lamtumirën të afërmve të tyre- edhe pse funerali do të ishte gjëja që ata do të kishin preferuar”, thuhet në deklaratën e NAFD.
Një opsion i mundshëm është filmimi i ceremonive mortore, ose zhvillimi i funeralit në një ditë tjetër.
Departamenti i Shëndetit dhe Përkujdesjes Sociale tha për “SKY” se të gjitha masat e marra nga qeveria, do të merren në konsideratë.
Sipas Organizatës Botërore të Shëndetësisë, që një sëmundje të cilësohet pandemi, duhet të përhapet në të gjithë botën.
Një zëdhënës i OBSH tha se koronavirusin mund të nisim ta përshkruajmë si pandemi, por për momentin është i përqëndruar vetëm në disa vende.
Në Shqipëri ndërkohë koronavirusi nuk është shfaqur ende.
Nisur nga ky fakt duhet të merren masa, në mënyrë që të mos na gjejë të papërgatitur.
Por a mund të implementohet në Shqipëri modeli i cili është propozuar në Britaninë e Madhe?
Në ceremonitë mortore tradicionale shqiptare zakonisht mblidhen shumë njerëz.
Sipas zakoneve shqiptare, trupi i të ndjerit/ës, qëndron 24 orë në shtëpi dhe gjatë kësaj periudhe ruhet nga familjarët dhe të afërmit, ndërsa arkivoli qëndron i hapur.
Më pas arkivoli mbyllet dhe të afërmit, familjarët dhe miqtë, e përcjellin trupin brenda arkivolit në varreza.
Në kushtet e përhapjes së koronavirusit, kjo metodë do të ishte shumë e rrezikshme, pasi rreziku i përhapjes së virusit do të ishte shumë i madh.
Gazetareforma.com kontaktoi me disa agjenci funerale në kryeqytet, të cilat dhanë mendimin e tyre dhe treguan nëse e mundësojnë apo jo këtë shërbim.
Natyrisht përgjigjet ishin të larmishme, që nga djegia e trupave, e deri te ato që pohuan se në Shqipëri është e pamundur që kjo të ndodhë.
Njëkohësisht kishte edhe nga ata që e kishin praktikuar këtë metodë.
Gazetareforma.com ju sjell opinionet e disa prej organizatorëve të ceremonive funerale “Habibi Globe” dhe “Parajsa” në Tiranë:
“Për momentin në Shqipëri nuk është përhapur dhe kjo është një çështje për të cilën do të vendosin autoritetet shtetërore. Mendoj se trupat do të digjen dhe ceremonitë nuk do të jenë më si ato tradicionalet.”
“Për momentin nuk është menduar kjo pjesë, por mendoj se mund të bëhet dhe ashtu do të bëhet. Ne kemi pasur edhe eksperienca të tjera, për shembull në azilin e pleqve kemi filmuar ceremoni dhe ua kemi dërguar familjarëve. Mendoj se do të përdoret metoda me mbyllje hermetike.”
“Në Shqipëri as mos u lodh fare. Nuk pranojnë njerëzit. Nuk besoj se bëhet.”
Për momentin në Shqipëri ende nuk është diskutuar kjo çështje dhe autoritetet shtetërore ende nuk janë prononcuar në lidhje me këtë rrezik të mundshëm.
Burimi: Gazetareforma.com
