Shembja e urës “Morandi” në Xhenova të Italisë rezultoi fatale edhe për dy të rinj shqiptarë. 22-vjeçari Marjus Djerri dhe shoku i tij Edi Bokrina humbën jetën teksa po udhëtonin me një fugon në autostrdën A10, ndërkohë që ishin duke shkuar për në punë.
Mësohet se në momentin që janë nxjerrë trupat e dy të rinjve shqiptarë kanë qenë të pranishëm edhe familjarët e tyre.
Ndërkohë që janë duke përjetuar dhimbjen e humbjes së djalit të tyre, një ndër familjarët e të riut Edi Bokrina, në një lidhje telefonike me “New 24”, rrëfeu mes lotësh e si ndodhi ngjarja e rëndë.
“Edi punonte në një fabrikë. Edi ka qenë vetë i dytë bashkë me në shok tjetër, një djalë nga Durrësi. Edhe ai humbi jetën”, tha Ruzhdi Mashku i afërmi i Edit.
Ai rrëfeu në këtë intervistë se familja është e shokuar nga ngjarja dhe është duke përjetuar një ndër momentet më të vështira të jetës së tyre.
Shembja e urës “Morandi” rezultoi fatale duke shkaktuar vdekjen e 39 personave deri më tani, midis të cilëve janë edhe 3 fëmijë. Ndërkohë zjarrfikësit po vazhdojnë punën për gjetjen e trupave të tjerë që kanë mbetur nën rrënoja.
Burimi: Balkanweb
