Ditën e djeshme një ngjarje tronditëse ka ndodhur në Klos. 2 vëllezër janë zënë për motive të dobëta dhe për pasojë 3 persona humbën jetën.
Sali Dakuci, ka vrarë me armë zjarri vëllain e tij, Kujtim Dakucin, nipin 17 vjeç dhe më pas veten.
Motra e viktimave ka dëshmuar në polici lidhur me ngjarjen dhe ka treguar se si brenda pak minutave i ka parë të tre të larë në gjak.
“Erdha për vizitë në Xibër se kemi babain sëmurë. I dëgjova të dy vëllezërit duke u zënë dhe dola jashtë e u thash; Mos u zini për gardhin, por eja shihni babain se është sëmurë. Duke u ngjitur nëpër shkallë (banesa e vjetër dy-katëshe), pasi ecja me ngadalë se kam sëmurë këmbën, dëgjova një krismë arme. Pash nga sipër Kujtimin të shtrirë përtokë. Më pas djali i Kujtimit, nipi im, iu sul Saliut duke thënë; “ça bërë?”. Dhe më pas dëgjova krismën tjetër…e pash nipin që u shtri përtokë. Më pas Saliu u largua nga banesa dhe u fut në një parcelë më misër dhe më pas kur pas 20 minutash dëgjova një tjetër krismë brenda tek banesa e tij (një kuzhinë e vjetër). Kur shkuam aty bashkë me gruan e Saliut, e pamë atë përtokë të mbuluar në gjak dhe pa shenja jete. Kishte qëlluar veten me plumb në kokë”, rrëfen mes lotësh motra e dy viktimave.
