Gazetari opozitar Raman Pratasevich, një kundërshtar kryesor i Presidentit autoritar të Bjellorusisë- Alexander Lukashenko, është arrestuar pabesisht me urdhër të presidentit Lukashenko.
Avioni i Ryanair që po fluturonte nga Greqia në Lituani të dielën, u ul me forcë në Bjellorusi pas një alarmi fals për bombë, për të arrestuar menjëherë pas zbritjes gazetarin opozitar që po udhëtonte me pasagjerët në bord.
Udhëheqësit e BE-së e kanë denoncuar “rrëmbimin” e avionit Ryanair dhe i kërkuan gjithashtu të gjitha agjencive ajrore me bazë në BE të shmangin fluturimin mbi Bjellorusi, ranë dakord të vendosnin sanksione ndaj zyrtarëve të lidhur me devijimin e fluturimit të dielën dhe i kërkuan Organizatës Ndërkombëtare të Aviacionit Civil të fillojë një hetim për ngjarjen që ata e shohin si një veprim të pashembullt dhe që disa thanë se ishte terrorizëm shtetëror ose pirateri.
Në një video të transmetuar të hënën, gazetari qartazi i dhunuar (me shenja në ballë dhe dhëmbë të thyer), foli i detyruar për mediat duke treguar se “qëndrimi i punonjësve ndaj meje është sa më korrekt që të jetë e mundur dhe sipas ligjit. Unë vazhdoj të bashkëpunoj me hetuesit dhe po rrëfej se kam organizuar trazira masive në qytetin e Minsk.”
Me urdhër të presidentit Lukashenko është arrestuar edhe partnerja e gazetarit, një shtetase ruse, të cilën po e përdorin gjithashtu padrejtësisht, për t’i bërë atij presion.
Pa dyshim, sanksionet e BE-së ndaj Bjellorusisë pas rrëmbimit kriminal të gazetarit janë të drejta. Ndalimi i fluturimeve mbi këtë vend është vendimi më i mirë që mund të merrej duke parë padrejtësinë dhe sulmimin e të drejtave themelore demokratike në Bjellorusi. Askush nuk është i sigurt të udhëtojë mbi këtë vend. Megjithatë, sërish vuajmë pasoja të këtij vendimi.
Pas miratimit të këtyre sanksioneve, pritet një goditje e turizmit për shkak të vështirësisë së krijuar me fluturimet.
Avionët me bazë në BE do të shmangin fluturimet mbi Bjellorusi, ndaj pritet të ulet ndjeshëm numri i fluturimeve dhe lëvizja e turistëve tashmë që situata e Covid-19 është në përmirësim. Kjo sigurisht prek edhe vendin tonë.
Pikërisht ky rrëmbim i paprecedentë i gazetarit opozitar po ndikon ndjeshëm në turizëm dhe pritet të sjellë pasoja drastike për të gjithë.
