Rrëmbimi i tre zyrtarëve të policisë së Kosovës nga forcat serbe në veri në zonën kufitare me Serbinë ka shkaktuar panik në Kosovë dhe ka lënë të shokuar opinionin se mos kjo është nisja e një lufte.
Lajmi është bërë me dije nga policia e Kosovës që thekson se tre efektivët e policisë janë rrëmbyer në brendësi të territorit gjatë një patrullimi në vendin e quajtur Tresave/Bare, në vijën kufitare në veri të vendit.
Pas kësaj ngjarje, Qeveria e Kosovës ka vendosur që asnjë mall nga Serbia nuk do të lejohet të hyjë në Kosovë, sipas mediave në Kosovë.
Ministri i Brendshëm i Kosovës dhe kryeministri Albin Kurti thonë se rrëmbimi është kryer 300 metra në brendësi të territorit të Kosovës, ndërkohë që që ministria e Brendshme e Serbisë thotë se ata kanë qenë brenda në territorin serb. Në një reagim të bërë së fundmi, Kurti tha se rasti lidhet me një hakmarrje të Serbisë për arrestimin e Millun Millenkoviç dhe shtoi se bëhet fjalë për përpjekje destabilizuese.
Kjo ngjarje po ndodh në kohën kur tensionet në veriun e Kosovës, të banuar me shumicë serbe, janë rritur. Tensionet nisën më 26 maj, kur kryetarët e rinj shqiptarë të komunave në veri, nën shoqërimin e Policisë së Kosovës, hynë në ndërtesat komunale, mes kundërshtimeve të serbëve lokalë.
