Një grua nga Lezha iu drejtua “Stop” për të kërkuar ndihmë që të shpëtojë nga bashkëshorti i saj pasi një urdhër mbrojtjeje ndaj tij nuk po zbatohet.
Viola Dodaj tregoi se Andrea Dodaj ka ushtruar dhunë ndaj saj që në vitin e parë të martesës dhe gjithashtu, edhe ndaj fëmijëve. Ata kanë dy vajza dhe një djalë. Sipas Violës, nxitësi i dhunës është edhe fakti se bashkëshorti nuk punon dhe luan bixhoz.
Viola tregoi se denoncimin e parë, në 2015-ën, e tërhoqi për hir të fëmijëve. Por në 2018-ën, gjërat u bënë përsëri të papërballueshme në shtëpi dhe ajo e denoncoi përsëri. Nga kjo padi fitoi një urdhër mbrojtjeje 12-mujor, i cili sipas Violës nuk po zbatohet.
“Në muajin Tetor të vitit 2018 e denoncova sërish, pasi më rrahu shumë keq madje dhe me kabull korrenti dhe mora dy vajzat dhe dola nga shtëpia, pasi djalin nuk ma la ta merrja. Kam dalë dhe kam shkuar tek shtëpia e mamit dhe i thashë që dua të shkoj në polici që të bëj denoncim. Policia nisi ta kërkonte, por nuk e kapi dot.”
E ndërsa urdhri i mbrojtjes s’pinte ujë kur policia s’po e kapte dot Andrean, një ngjarje tronditëse për Violën ndodhi në nëntor, kur Andrea u bë përsëri i gjallë.
“Më merr Andrea në telefon dhe më thotë: “Do vish tek Kalaja“. Këtu është një vend i braktisur. Më tha që do merrja fëmijët, por kur erdha nuk kishte fëmijë, por më tha: “Këtu jemi drejt fundit”. Nuk më ka lënë të iki, më ka tërhequr për dore dhe më ka mbyllur gojën, kam bërtitur por asnjë nuk më ka dëgjuar. Më ka tërhequr zvarrë nga këtu deri tek Kalaja duke më rrahur dhe më dhunuar keq. Kam ikur këmbë zbathur, sepse atletet më ngelën rrugës, kam shkuar në polici dhe më pas tek mjeku. Kam marrë sërish një urdhër mbrojtje të dytë. Nga 17 Prilli thonë që është arrestuar, nga policia, ndërsa Gjykata thotë, jo, nuk i jepet dum çfarë është bërë. Prokuroria thotë që denoncimi i dytë është i rremë. Në sistem del që nuk ka qenë në Shqipëri. Ai mund të vijë dhe nga mali. Dhe nëse nuk është kapur të kapet. Unë dua fëmijët e mi dhe që drejtësia të vihet në vend.“
Përballë mosbesimit të organeve ligjzbatuese, mjeku që përgatiti raportin mjeko- ligjor konfirmoi për “Stop” se në të dyja herët Viola ka qenë me të vërtetë e dhunuar.
Ndërkaq, në Policinë e Lezhës doli se Andrea paskësh qenë i arrestuar që nga data 17 prill dhe ka qëndruar i mbyllur për një muaj në burgun e Shën Kollit, deri në 9 maj. Sipas zëdhënësve të policisë, ishte një gabim se Viola nuk është njoftuar. Por gjithë kjo çështje, sipas tyre po shtyhet pasi po gjykohet “me gjakftohtësi, që Viola mos me pas asnji shqetësim.”
Stop – Lezhe, dhunohet nga i shoqi, por akuzohet per kallzim te rreme! (03 qershor 2019)
stop.tvklan.al Nje emision satiro-investigativ nga Saimir Kodra & Gentian Zenelaj. E hene – E premte ora 20:05 @ Tvklan & KlanHD; Viola Dodaj, nga Lezha, tregon, se ka qenë e martuar prej 8 vitesh me Andrea Dodajn, martesë nga e cila kanë ardhur në jetë dy vajza dhe një djalë.
