Një rrëfim tronditës mbi adoleshencën e Mbretëreshës Camilla është bërë publik në librin më të ri për monarkinë, me titull “Power and the Palace”. Sipas autorit Valentine Low, Camilla ka qenë viktimë e një tentative sulmi seksual kur ishte vetëm 16–17 vjeçe, por arriti të mbrohej falë një reagimi të shpejtë dhe vendimtar.
Ngjarja, e cila ndodhi në një tren që udhëtonte drejt Paddington-it, u bë e njohur shumë vite më vonë. Gjatë një bisede të ngrohtë, por serioze me Boris Johnson, asokohe kryetar i bashkisë së Londrës, mbretëresha e ndau historinë, duke e treguar me humor të hidhur dhe vendosmëri. “Një djalë u afrua duke tentuar të më prekte. Më kujtohet këshilla e nënës: hiqe këpucën dhe mbrohu. Kështu bëra, e godita me takë në testikuj,” kujtoi ajo.
Sipas dëshmisë së Guto Harri, ish-drejtorit të komunikimit të Johnson, Camilla tregoi se pas incidentit kishte kërkuar ndihmë tek një roje në stacionin e Paddington-it, i cili menjëherë mori masa dhe bëri të mundur arrestimin e agresorit.
Sot, në moshën 78-vjeçare, Mbretëresha Camilla njihet si një nga zërat më aktivë në sensibilizimin kundër dhunës në familje dhe abuzimit seksual. Përkushtimi i saj në fushën e bamirësisë është konkretizuar në nisma të ndryshme, përfshirë edhe paketat ndihmëse për viktimat e sulmeve, një ide që ajo e ka mbështetur fuqishëm dhe që vazhdon të zbatohet edhe sot.
