Elvana Gjata ishte një nga personazhet që u përfshi në ngjarjen e 4 tetorit, që ndodhi në një lokal të ish-Bllokut, ku mbeti i vrarë një person dhe u plagosën dy të tjerë.
Ndërsa humbi gjurmët pas ngjarjes, ku përfshi dhe i fejuari i saj Ervin Mata, këngëtarja mësohet se u rikthye në atdhe të shtunën e javës që lamë pas, më 24 nëntor.
Ajo kërkohej nga policia për të dhënë dëshminë e saj lidhur me masakrën, ku mbeti i vrarë Fabian Gaxha dhe u plagosën Ervis Martinaj dhe Elio Hato.
Pesë ditë më parë këngëtarja shqiptare u ndalua në Rinas dhe më pas u shoqërua në ambientet e Policisë së Tiranës. Në këtë të fundit ajo qëndroi për 40 minuta, ndërsa “Shqiptarja.com” zbardh dëshminë e saj lidhur me ngjarjen.
Në deklaratë thuhet që, Gjata pranoi se ishte e pranishme në 4 tetor 2018 në zonën e ish-bllokut në Tiranë. Ajo rrëfeu se ishte para lokalit “Monopol” pasi i dha çelësin e shtëpisë të fejuarit, Ervin Mata dhe takimi mes tyre u bë në trotuarin në ish-Bllok. Sipas dëshmisë së saj, në këtë moment janë afruar disa djem dhe i kanë folur të fejuarit, me të cilin kanë filluar të shtyhen. Në këto momente dyshohet se personat që u konfliktuan me Ervin Matën e kanë sharë këtë të fundit duke i përmendur edhe të fejuarën, e kjo ka sjellë agravimin e konfliktit, teksa në ndihmë të Matës ka shkuar edhe Merviol Bilo.
Elvana është shprehur se nuk i njihet këta djem dhe nuk i kishte parë ndonjëherë më parë. Ajo u largua me makinë dhe nuk kishte dijeni se çfarë kishte ndodhur më pas. Këngëtarja pohoi që komandon Merviol Bilo e ka kushëri dhe ai qëndronte herë pas here me të dhe të fejuarin e saj. Ndërkohë ky i fundit është në kërkim nga policia.
Në bazë të dëshmive të personave të pyetur, por edhe hetimeve nga grupi hetimor, rezulton se shkak për sherrin nuk ka qenë ngacmimi i këngëtares, por një sherr i mbartur i të fejuarit të saj, Ervin Mata, me disa persona të tjerë, ku përmendet emri i biznesmenit Eldi Dizdari. Ky i fundit është partneri i ish-Miss-it, Suada Sherifi, ndërsa shkak i sherrit raportohet se janë pazaret e drogës.
Burimi: Shqiptarja.com
