Lindita Halimi ishte ajo që i shpëtoi tmerrit të sulmit në aeroportin turk falë një vendimi. Këngëtarja udhëtoi për në Turqi për të xhiruar për një projekt, e cila duhej të nisej ditën e martë për t’u kthyer në Amerikë.
Lindita thotë se ajo kishte një biletë për t’u nisur nga Aeroporti “Ataturk” i Stambollit, por pasi nuk kishte përfunduar xhirimet, vendosi ta shtynte qëndrimin edhe dy ditë më shumë.
“Sot duhej të nisesha për në Amerikë, në të njëjtin aeroport ku ndodhi bombardimi, “Ataturk”. Nuk u nisa sepse nuk mbaruam në kohë me xhirimet. Vendosëm të niseshim pas dy ditësh”, shprehet këngëtarja.
E prekur nga ngjarja, Lindita rrëfehet e përlotur në një video në “Facebook”: “Jam zbehur, dhe jam akoma në shok, sikur të kisha qenë aty…ndihem mirënjohëse, ndihem gjallë. Mund të kisha qenë unë. Unë supozohej të isha sot atje (në aeroport)…nuk di ç’të them. Dua të them që kur Zoti nuk të jep fatin e vdekjes, të bën ta vlerësosh më shumë jetën, nëse nuk ke ditur ta vlerësosh”.
Sulmi me armë zjarri e bomba u mori jetën 36 personave e plagosi 147 të tjerë. Tre ishin personat që hapën zjarr pranë një pike hyrëse të terminalit e hodhën veten në erë pasi policia nisi të qëllonte mbi ta.
