Radhë e gjatë është krijuar në prag fundjave në pikën kufitare të Kapshticës.
Kalimi në kufi ka nisur nga pala greke në orën 06:00, ndërsa të parët që kanë hyrë kanë qenë ata emigrantët që kanë mbetur të bllokuar një ditë më parë.
Ende nuk është plotësuar kuota ditore prej 300 personash, por një numër i lartë emigrantësh presin me shpresën se mund të kalojnë ende pa u plotësuar kuota ditore.
Problemi kryesor që haset në këtë pikë kufitare është se leja e udhëtimit të shumë prej emigrantëve është fotokopje. Ata nuk kanë plotësuar formularin ku shfaqet edhe me bar kodi.
Numri i të kthyerve është i lartë, dhe pala shqiptare po mbledh të gjithë këto leje udhëtimi fotokopje për të vendosur më vonë se çfarë do të bëhet me këta emigrantë, do të lejohen të kalojnë apo do të kthehen pas, raporton Report tv.
Kriteret për të kaluar kufirin:
Të gjithë ata shtetas të cilët plotësojnë kriteret e vendosura për të udhëtuar drejt Greqisë (qytetarët me shtetësi greke, personat që kanë leje qëndrimi në Greqi, personat me kartë minoritari, personat që kanë vendbanimin e tyre kryesor në Greqi, si dhe ata që e kanë të domosdoshme të udhëtojnë për arsye profesionale-pas marrjes së lejes së posaçme), duhet të paraqesin në kufi edhe dokumentacionin sa më poshtë:
– Testin negativ të COVID-19 (RT-PCR), i cili duhet të jetë kryer deri 72 orë para mbërritjes në pikën e kalimit kufitar, nga laboratorët publike apo private të certifikuara në Shqipëri. Ky rregull nuk vlen për shoferët e kamionëve që transportojnë mallra dhe fëmijët nën 10 vjeç.
– Vërtetimin diagnozë të përkthyer në anglisht, në të cilin duhet të jenë të shënuara emri, mbiemri dhe numri i pasaportës/numri i kartës së identitetit të individit.
– Vërtetimin e plotësimit të formularit të posaçëm PLF, me kodin QR (nga adresa elektronike https://travel.gov.gr).
Nënvizojmë se testi i COVID-19 (RT-PCR) është i vlefshëm vetëm nga laboratoret e linçesuar nga Ministria e Shëndetësisë dhe Mbrojtjes Sociale, të cilat mund ti gjeni në faqen zyrtare: https://shendetesia.gov.al/ mbi-njohjen-e-strukturave- jopublike-per-kryerjen-e- testit-rt-pcr/.
