Romela Begaj bëri krenar çdo shqiptar dhe arriti një rezultat historik për peshëngritjen shqiptare, në botërorin e peshëngritjes që po zhvillohet në SHBA.
31-vjeçarja arriti të fitonte medaljen e artë pas 45 vitesh, duke thyer edhe rekordin personal.
Begaj u shpall fituese në stilin me shkëputje dhe po ashtu u shpall nënkampione e botës në dygarësh. Në shkëputje ajo provoi 131 kilogramët, por nuk ia doli dhe pësoi një dëmtim serioz në shpinë, duke mbetur e shtrirë në tokë dhe u largua me ndihmën e stafit të saj.
Por ndërsa të gjithë e kishim mendjen nga fitorja që korri sportistja shqiptare, u dalluan disa gabime, që mund të cilësohen të patolerueshme për një shtet.
Flamuri shqiptar që u valëvit gjatë himnit nuk ishte në formatin e duhur, siç ishin flamujt e shteteve të tjera.
Dhe për më tepër, nuk ishte marrë një flamur i formatit origjinal, por një imitim kinez, të cilin e gjejmë rëndomtë nëpër tregjet shqiptare.
Përgjegjësia për këto bie mbi Federatën Shqiptare të Peshëngritjes, pasi flamujt, uniformat, etj., merren me vete në çdo turne. Nga ana tjetër kujtojmë që ky veprim nuk krahasohet me atë të mos dhënies së vizës për shtangistin Daniel Godelli.
Këtij të fundit iu mohua viza nga Ambasada amerikane, me arsyen e mungesës së garancisë se Godelli do të rikthehej në atdhe.
