Barron Trump, djali i vetëm i presidentit amerikan Donald Trump dhe zonjës së parë Melania, është parë kohët e fundit duke zhvilluar një takim romantik në një vend të njohur për familjen e tij: Trump Tower në Manhattan.
Sipas burimeve për Page Six, zgjedhja e ndërtesës ikonike nuk ishte thjesht çështje stili apo preferencë personale, por kishte të bënte me shqetësimet për sigurinë. 19-vjeçari kishte në dispozicion një kat të tërë të godinës për të garantuar privatësinë e takimit të tij.
Edhe pse jeton kryesisht në Uashington, raportime nga New York Post kanë spekuluar se ai ndan kohën mes kryeqytetit amerikan dhe qytetit të Nju Jorkut, ku ndjek studimet universitare pranë kampusit të NYU (New York University).
Kujdesi për privatësinë nuk është i ri për Barron Trump. Që në prill, Page Six kishte raportuar se ai shmangte ndarjen e numrit personal të telefonit me shokët e fakultetit, nga frika se informacionet mund të rridhnin në publik.
Në vend të kësaj, ai preferonte të komunikonte përmes platformave më pak formale dhe më “të sigurta” në perceptim, si Xbox chat, një mënyrë paksa jo e zakonshme për një student universitar, por që tregon përpjekjen për të ruajtur kontrollin mbi kontaktet e tij.
Burime të afërta me rrethin shoqëror të Barronit kanë thënë për Page Six se shqetësimet për privatësinë janë reale. “Nëse njerëzit e marrin numrin, do ta shpërndajnë menjëherë, dhe pastaj telefoni i tij do të shpërthejë nga thirrjet. Do t’i duhet ta ndryshojë vazhdimisht,” kanë komentuar ata.
Për këtë arsye, Barron ruan një profil të ulët, pavarësisht emrit të madh që mban. Takimet, komunikimi me shokët dhe mënyra e jetesës duket se janë të gjitha të filtruar përmes një lenteje sigurie dhe vetëkontrolli.
