Stadiumi i kryeqytetit, Air Albania, do të mirëpresë ndeshjen e famshme Roma-Feyenoord dhe sportdashësit mezi po presin ditën!
Finalja e Ligës do të mbahet më 25 maj dhe të shumtë janë ata që kanë planifikuar të vizitojnë Tiranën nga jashtë vendit, për të ndjekur ndeshjen në kryeqytet. Mirëpo, si çdo gjë tjetër me të cilën janë mësuar të abuzojnë, shqiptarët po abuzojnë në masë edhe me çmimet.
Mjafton një kërkim i thjeshtë në Booking për të kuptuar se vetëm për një natë qëndrimi në një prej hoteleve të vendit, çmimet kanë shkuar në stratosferë (deri 8000 euro nata). Hotelet që në data të tjera kanë çmime normale, kanë vendosur në datat 25-26 maj çmime stratosferike që në fakt nuk përputhen fare me kushtet të cilat ofrojnë.
Më poshtë ju tregojmë një kërkim të thjeshtë në Booking për datën kur do të luhet ndeshja dhe pritet të vijnë turistë të shumtë.
Kryeqytetit, që për herë të parë po organizon një ndeshje të përmasave europiane, do t’i cënohet gjithashtu imazhi i turizmit në vend. Askush nuk është angazhuar ende për të kthyer normalitetin e këtyre çmimeve skandaloze, që shkuan në stratosferë vetëm për një ndeshje futbolli.
“Po shiten dhomat e hoteleve për datat 25-26 maj me çmime nga 600-9000€/nata për një ndeshje sporti që duhet të jetë një manifestim i vlerave të Kryeqytetit të Rinisë 2022. Ftoj z. Veliaj dhe Min Financave të angazhohet seriozisht për të kthyer normalitetin. Ky është abuzim i pastër që do dëmtojë rëndë imazhin e Shqipërisë”- është shprehur Zak Topuzi, kreu i Shoqatës së Hoteleri-Turizmit në vend.
Turistët duhet të pyesin mirë xhepat nëse duan të shikojnë ndeshjen, sepse vendi ështi i gatshëm t’i zhvasë e t’i heqë pikë vetes, vetëm për të fituar disa para më shumë.
Jo vetëm hotelet në qendër të Tiranës por edhe ato larg saj po abuzojnë me çmimet e kripura, ndërsa Shqipëria tenton të hyjë në listën e vendeve pritëse për evente të rëndësishme në art, kulturë apo sport.
