Chris Cornell, këngëtari i grupit amerikan “hard rock” Soundgarden dhe Audioslave, ndërroi jetë në moshën 52-vjeçare.
Ai, i cili ishte një nga zërat më të rëndësishëm të 30 viteve të fundit, ndërroi jetë papritur.
Në një deklaratë për “Associated Press”, përfaqësuesi i tij, Brian Bumbery, tha se Cornell vdiq të mërkurën mbrëma në Detroit.
Bumbery e quajti vdekjen “të papritur dhe të papandehur” dhe tha se bashkëshortja dhe familja e tij ishin të tronditur. Deklarata thotë se familja do të punojë ngushtë me ekzaminuesin mjekësor për të përcaktuar shkakun e vdekjes dhe kërkuan privatësi.
Cornell kishte qenë duke udhëtuar ne turne me grupin Soundgarden dhe ishte duke shkruar mesazhe optimiste rreth një koncerti, që grupi mbajti në Detroit vetëm disa orë para vdekjes së tij.
Soundgarden u bë pjesë e skenës në fund të viteve 1980 dhe në fillim të viteve 1990, duke u krijuar së bashku me grupe si, Nirvana. Ashtu si Nirvana, ata nënshkruan një marrëveshje me kompaninë diskografike “Sub Pop”, para se të bënin hitin “Black Hole Sun”.
Grupi shiti më shumë se 10 milionë albume vetëm në SHBA dhe u nominua për 9 çmime “Grammy”, duke fituar dy prej tyre. Ata u ndanë në vitin 1997, por u bashkuan sërish në vitin 2010. Albumi i tyre më i fundit ishte “King Animal” në vitin 2012 dhe kanë punuar këngë të reja gjatë viteve të kaluara.
Chris i shtohet shiritit të zi të vdekjeve të legjendave të muzikës: Kurt Cobain vdiq vetëm 27 vjeç, e më pas Layne Staley i Alice in Chains, apo së fundmi Scott Weiland i Stone Temple Pilots.
Burimi: The Guardian
