Që në natën e parë mes Robert Aliajt dhe gazetares Fiori Dardha pati një përplasje gjatë spektaklit të “Dance with me” dhe duket se nuk u la me aq. Dardha nuk e harroi fyerjen “gazetare mediokër” që Roberti i tha javën e kaluar, ndaj mbrëmjen e së hënës vendosi të çonte nderin e saj në vend.
Pas kërcimit të Fiorit dhe Iljardit, Roberti i bëri një koment që duket se gazetares nuk i erdhi aspak mirë: “Kërcen si plastik, është bërë një situatë si azil pleqsh”. Kaq mjaftoi që Fiori të replikonte edhe pse dukej që gazetarja e kishte ndarë mendjen për të marrë disa minuta televizive për t’i shfryrë të gjitha ndaj tij:
“Më vjen shumë keq, e kam parë në të gjitha daljet publike të Robertit. Është për të ardhur keq që shumë meshkuj veprojnë kështu si Berti… Nuk di të kërcej fare, por më pëlqen shumë të kërcej. Mund të jem edhe gazetare shumë e keqe, por kam një jetë në ekran dhe ata që më punësojnë tregon që diçka vlerësojnë tek unë. Ama si grua nuk lejoj askënd të më fyejë. Këtë e kam për të gjitha gratë shqiptare dhe më vjen shumë keq që njerëz si Berti përpiqen të sjellin një përvojë europiane në Shqipëri, ndërkohë që veprojnë si anadollakë duke u përpjekur t’i frenojnë gratë shqiptare dhe duan të mposhtin dhe të nënshtrojnë figurën femërore…”, tha Fiori.
Nga ana tjetër, Roberti iu drejtua se nuk ka asgjë personale me të, por ajo s’është veçse një gazetare llafazane:
“Nuk është faji im që dua të vlerësoj njerëz që duan të bëjnë art, dua një zonjë skene, një zonjë ekrani, ndërsa ju jeni provincialë… Unë nuk kam prirje të merrem me individë dhe dua t’u them stop fenomeneve kaq banale”.
Por dukej që nuk ishte diçka personale, ndaj Fiori e ftoi në një festë pas emisionit dhe Roberti pranoi.
