Robert Aliaj ishte sot ndër ata që shkuan për të votuar vetëm për ta bërë votën të pavlefshme.
Këngëtari publikoi në rrjetet sociale fletën e votimit ku poshtë emrave të dy kandidatëve të vetëm për kryetar bashkie në Tiranë, Erjon Veliaj dhe Arben Skënderaj, ka shkruajtur:
“Dua të vdes”.
Aliaj e shoqëron foton me një mesazh ku thotë se i ka humbur shpresat për një Shqipëri më të mirë.
“Kjo është një fletë votimi e plotësuar sot në mëngjes. Kjo është zgjedhja e lirë e qytetarit shqiptar që e gjen më me vend të vdesë. Ky është besimi i humbur i shqiptarëve.
“Shqipëria është një trup i vdekur. I shpëlarë nga historia sepse ajo ka tradhtuar gjithçka, shqiptarët si krimbat që e bëjnë pluhur kufomën e saj.”
Aliaj, i cili jeton në Bruksel të Belgjikës, është treguar gjithmonë i hapur sa i takon qëndrimit kritik qoftë për politikën, ashtu edhe mentalitetin shqiptar.
Kujtojmë se në dhjetor ai u prezantua tek faza e parë e “Kënga Magjike” me këngën “Ah, ku më hodhi Zoti”, një pjesëmarrje kontraverse për shkak të natyrën recituese të interpretimit të tij, dhe tekstit bazuar tek vargjet e poezisë së Fan Nolit, “Anës lumenjve”.
Por në fakt, ajo qe siç u shpreh këngëtari, një mënyrë për të tërhequr vëmendjen e qytetarëve që të heqin dorë nga indiferenca ndaj mënyrës si funksionon realiteti shqiptar.
