Komuniteti LGBTQ+ në mbarë botën ka shpërthyer nga entuziazmi pas fitores historike të politikanit liberal Rob Jetten, i cili pritet të bëhet kryeministri më i ri në moshë në historinë e Holandës. Në moshën vetëm 38-vjeçare, Jetten, që drejton partinë centriste D66, doli fitimtar në zgjedhjet e të së mërkurës kundër populistit të djathtë ekstrem Geert Wilders. Përveç moshës së re, ai hyn në histori si kryeministri i parë holandez që deklarohet hapur si homoseksual.
Jetten mori drejtimin e D66 në vitin 2023 dhe arriti të fitojë terren përmes një fushate të balancuar midis liberalizmit progresist dhe politikave realiste për emigracionin. Ai u bë figurë e njohur edhe për pjesëmarrjen në emisionin e popullarizuar “De Slimste Mens”, ku u shfaq si një politikan energjik dhe i afërt me publikun. Megjithëse i njohur për qëndrimet e tij pro barazisë dhe mjedisit, Jetten u veçua nga establishmenti i majtë kur kërkoi kontrolle më të forta mbi flukset migratore, duke pranuar se emigracioni i pakontrolluar mund të krijojë presion në zonat punëtore.
Por përveç karrierës politike, jeta private e Jetten ka marrë shumë vëmendje. Ai është në një lidhje me Nicolás “Nico” Keenan, një sportist profesionist 28-vjeçar nga Argjentina, i cili luan hokej për klubin holandez HC Klein Zwitserland dhe ka përfaqësuar vendin e tij në Lojërat Olimpike të Tokios dhe Parisit 2024. Keenan, që identifikohet si biseksual, pritet të bëhet “Zotëriu i Parë” i Holandës.
Dyshja u njoh në Hagë në vitin 2022, pasi banonin afër njëri-tjetrit dhe shpesh takoheshin në zonën ku jetonin. “Banonim afër dhe kështu u njohëm. Tani kemi mbi dy vite bashkë”, ka treguar Jetten për “De Telegraaf”. Edhe Keenan ka folur me sinqeritet për lidhjen e tyre, duke e përshkruar si një kthesë pozitive në jetën e tij pas një periudhe të vështirë personale. “Me Rob gjithçka shkoi në vend. Jam shumë mirënjohës”, ka thënë ai për “Trouw”.
