Ministrja e Arsimit, Besa Shahini ka folur ditën e sotme në lidhje rikthimin në shkolla në kushtet e pandemisë në të cilën po jetojmë.
Gjatë një komunikimi virtual Shahini tha se mësuesit dhe drejtuesit e shkollave kanë përgjegjësinë për të informuar prindërit lidhur me udhëzuesin e miratuar tashmë. Sa i përket nxënësve që s’munden ose rrezikojnë të vijnë në shkollë prej COVID-19, mund të ndjekin mësim online ose paralelisht leksionet në RTSH.
Gjithashtu Shahini iu përgjigj edhe pyetjeve se përse nuk lejohet ushqimi në shkolla duke thënë se diçka e tillë do të rriste rrezikun e infektimit nga COVID-19.
Por sa rrezik mund të përbëjë ushqimi me vete në krahasim me vetë faktin që nxënësit do t’i rikthehen shkollave. Ka shumë faktorë të tjerë që sjellin me shumë rrezik te nxënësit gjatë kohës që ata do të jenë në bankat e shkollës.
Sipas Ministrisë së Shëndetësisë, nxënësit duhet të jenë të gjithë të pajisur me maska me një përdorim ose mbrojtëse të fytyrës prej tekstili (maskë) të cilat duhet të lahen në 60 gradë dhe të hekurosen, si dhe shami letre për higjienën e hundëve.Por sa mund t’i mbrojë fëmijët një maskë që do të preket shumë herë nga duart e fëmijëve të cilët janë në kontakt të vazhdueshëm me papastërtitë që shkollat në Shqipëri kanë.
Edhe distancimi fizik midis nxënësve është një tjetër problem me të cilin do të përballemi sapo të hapen shkollat . Duket e pamundur të mbash larg dy shokë që kanë më shumë se tre muaj pa u parë që të mos takohen në klasë, në oborrin e shkollës apo ambiente të tjera.
Rikthimi në shkollë në kulmin e pandemisë nuk është zgjedhje e MSH me dëshirë, por zgjidhje nga halli që i japin problemit të shkollimit. Dhe kjo shifër, që përkthehet në jetë njerëzish në periudhë pandemie, do të ulet shumë më shumë kur këta njerëz, (që qeveria mendoi se iu plotësoi dëshirat për të marrë mandatin), të përballen me pasojat që do të sjellë vendimi i nxituar i hapjes së shkollave, që rrjedhimisht do të paguhet me votë.
/Gazeta Reforma
