Për çfarë revoltoheni ju?! Për padrejtësitë që ju bëhen në jetën e përditshme, faturat e shtuara apo debatet me batuta të pavlera të politikës. Gjërat për të cilat do të donit të ngrinit zërin nuk janë të pakta! E njëjta gjë vlen edhe për Rudi Gegën, i riu shkodran, që njihet si një nga reperët që shpreh përmes këngës të “vërtetën lakuriqe”.
Dikur rimat dhe tekstet e këngëve të tij origjinale, kanë shërbyer si një frymëzim për reperat e rinj shqiptarë, deri në pikën që ka pasur mjaft prej atyre që i kanë përdorur ato në rrugëtimin muzikor.
Por, sot Rudi Gega i ka dhënë jetës një tjetër drejtim. Jetesa në SHBA dhe shkollimi që ka kryer atje, kanë ngjallur tek ai pasionin për politikën, pavarësisht se me keqardhje sot e pranon për “Iconstyle” se, “politikës kudo në botë, po ia merr frymën paraja”.
Por angazhimi i tij me politikën nuk ka mbetur thjesht në letër. I sapodiplomuar, Rudi është kthyer për një vit në Shqipëri, për aktivizim politik, por është zhgënjyer nga mundësitë që vendi i tij ofronte, aq sa për të bërë karrierë Rudi kuptoi se, “duhet të vësh mënjanë dijen, dëshirat e vizionin për t’iu nënshtruar padijes e arrogancës”.
Zhgënjimi në vendin e tij nuk ia mposhti pasionin për politikën shqiptare, të cilën ai thotë se, e ndjek me vëmendje pavarësisht se është larg. Flet me respekt edhe për një politikan shqiptar, tek i cili thotë se e gjen veten. Sot, Rudi Gega njihet si një ndër personat që ka dhënë kontributin e tij për njër një nga kandidatët në fushatën presidenciale në SHBA.
Të gjitha këto angazhime e kanë mbajtur Rudin larg nga muzika, por dëshira e fansave të tij për ta dëgjuar edhe njëhere rimën e tij origjinale, bënë që Rudi të rikthehej pas shumë vitesh, me një këngë të bujshme që ka ngjallur jo pak polemika e të cilat ai i sqaron në intervistën e mëposhtme për “Iconstyle”.
Intervista e plotë me Rudi Gegën:
Kanë kaluar vite që kur angazhimi juaj në muzikë, ju bëri një ndër reperat më origjinalë dhe më të dashur për publikun. Pse e braktisët muzikën? A ju pengoi jeta në SHBA dhe angazhimet atje?
Kur vendosa të vij në Amerikë, nuk vendosa të braktis muzikën por kur erdha në Amerikë, jeta ime ndryshoi. Patjetër që angazhimet ndikuan shumë. Koha e lirë këtej është e reduktuar. Detyrat dhe kërkesat universitare dhe impenjimet familjare atëhere ma bënë të pamundur përqendrimin te muzika.
Ku bazohet frymëzimi për rikthimin me një këngë si “Ça ban Rudi”? Pse pikërisht një këngë të tillë që ngjan si një lloj revolte, pas kaq shumë vitesh mungesë?
Ishte në fakt një intepretim shpërthyes pas një akumulimi ngjarjesh, vrojtimesh dhe eksperiencash në kohë dhe fusha të ndryshme.
A ju mjafton vetëm një këngë për të shprehur atë që ndieni? Mos ndoshta keni në plan një album? Nëse jo, cili është projekti juaj i radhës..
Sot, mund të them që s’kam një plan. Ajo këngë u realizua për të përmbushur dëshirën e atyre që vazhdimisht më kanë kërkuar këngë. Dua të falënderoj në veçanti Bes Kallakun për bezdisjen konstante dhe Maringlen Bojen për produksionin tepër cilësor.
Çfarë përgjigje keni për ata që thonë se teksti i këngës “Ça ban Rudi” është disi i ashpër dhe me “fjalë të pista”…
Është pak i ashpër dhe me fjalë të pista, por i kam përdorur natyrshëm. Ata që habiten, nuk besoj që si përdorin vetë në përditshmëri.
Në këngën e re shpreheni tekstualisht, “Rimat e mia ke kopju”… Për kë e keni në veçanti…
Në këngët e mia, asnjëherë nuk kam qenë i drejpërdrejtë me një individ. “Sulmet” apo provokimet e mia nëpër këngë mbeten brenda të pranueshmes.
Duket sikur i drejtohem dikujt pasi kam folur në vetën e dytë por jo. Ka disa të njohur e të panjohur që kanë përdorur me apo padashje rimat e mia në rrugëtimin e tyre muzikor. Disa ma kanë pranuar me sinqeritet vetë. Nuk ka asgjë t’i marrësh, e mua nuk më shqetëson, por të bësh sikur s’të kujtohen, sepse nuk jam me popullor e aktiv si dikur, është hipokrizi. Kur në vitin 2012 unë realizova këngën “100 % shqiptar”, u kërkova ndihmë për “share” disa artistëve e personave publikë që ta shpërndanin në “Facebook”, shumë pak u përgjigjën.
Cili është komenti ose interpretimi më i çuditshëm që ke dëgjuar për veten pas publikimit të këngës “Ça ban Rudi”?
Komentet në pjesën dërrmuese kanë qenë komplimentuese dhe euforike. (qesh). Kam lexuar komente kritike në faqe ose statuse të tjera, por e dija para se të publikohej kënga që do të ishte e debatueshme pasi vetë teksti ngre debat e polemika. Nuk kam lexuar ose nuk kujtoj ndonjë koment të çuditshëm të bërë te faqja ime në “Facebook”.
Dhe “Ca ban Rudi” kur i vjen në vesh dicka e tillë për veten…
Rudi i ban tana, por ka zgjedh mos me i ba ca gjana (qesh).
“Ca ban Rudi” aktualisht në SHBA? Me çfarë jeni i angazhuar?
Këtej i kam ditët shumë të ngjashme me njëra-tjetrën. Nuk bëj jetën e zhurmshme që shumë kush mund të mendojë. Kam zgjedhur të jetoj në një shtet të qetë, të bukur e të gjelbëruar. Kam një biznes timin që më merr shumë kohë.
Ju e keni thënë shpesh herë në intervista të tjera se i ndiqni me kureshtje zhvillimet politike në Shqipëri. Keni qenë i angazhuar edhe me fushatën presidenciale në SHBA. Cfarë përshtypje ju lë politika shqiptare në raport me atë amerikane, të cilën e keni ndjekur nga afër?
Po kam qenë i angazhuar me kohë të pjesshme në fushatën e Bernie Sanders. Kam dhënë kontributin tim për çështjen/programin e duhur dhe njeriun e duhur. Të paktën kështu besoj unë. Politika sot kudo në botë, sidomos në vendet perëndimore, sa vjen e njësohet. Politikës, si në SHBA ashtu dhe në Shqipëri, po ia merr frymën paraja. Teoritë dhe ideologjitë politike, po bëhen të pavlefshme gradualisht. Demokracia në praktikë apo në aplikim po bëhet gjithnjë e më e vështirë.
Sistemi sot është oligarkik e korporatist por fytyrat e këtij sistemi jo njerëzor, flasin me elokuencë e pasion për demokraci dhe zgjedhje të lira.
Mbi të njëjtin sistem zhvillohet politika në të dy vendet por ndryshimi thelbësor mes Amerikës dhe Shqipërisë, është sistemi i drejtësisë dhe cilësia e arsimit.
Pse pikërisht po merresh me politikë, përtej studimeve të tua. Çfarë rëndësie ka politika për ty?
Unë jam diplomuar për politikë e s’kam se si i shpëtoj politikës. E kam pasion dhe e ndjek atë. Jo vetëm politikën, por shumë rrafshe të tjera që ndikojnë jetën e njerëzve. Të gjithë njerëzit janë të përfshirë me apo padashje në politikë. Jam kurioz dhe kam interes për zhvillime apo ngjarje që e ndryshojnë për mirë apo për keq jetën e njerëzve.
A ka ndonjë politikan në Shqipëri që do ta veçonit për të punuar ose për t’u angazhuar në një fushatë për të?
Për nga guximi, intelekti, vizioni dhe komunikimi politik, unë e gjej veten vetëm te Ben Blushi. Unë jam i majtë dhe liberal/progresiv në bindje. Në tërë spektrin politik shqiptar, Blushi më duket me origjinali në artikulimin e ideve dhe në denoncimin e se keqes në Shqipëri.
Kur flasim për ndryshimet mes jetesës në SHBA dhe asaj në Shqipëri, çfarë ju pëlqen në Amerikë që do ta donit në Shqipëri dhe anasjelltas…
E para dhe më e rëndësishmja për mua janë njerëzit. Më mungojnë njerëzit e afërt dhe kushërinjte. Me njerëzit e duhur, jetesa është e bukur dhe e kënaqshme kudo. Nga Amerika në Shqipëri do të merrja respektin për ligjin e shkruar dhe ndërveprimin shoqëror mes njerëzeve, bazuar në norma dhe rregulla të pashkruara, por të gjithpranuara. Në Amerikë mund të kesh stres, por jeton me dinjitet dhe respekt. Edhe pse janë reduktuar ndjeshëm, opurtunitetet gjenden.
Në Shqipëri jeton me stres, por duhet të kompromentosh edhe dinjitetin dhe respektin ndaj vetes. Kuptohet që ka përjashtime në të dy vendet.
Kur thoni se në Shqipëri duhet të kompromentosh dinjitetin dhe respektin ndaj vetes, keni ndonjë eksperiencë tuajën…
Isha plot një vit në Shqipëri 2012-2013, për aktivizim politik, sepse isha i sapodiplomuar. Të bësh kompromis është normale, por kuptova që për karrierë duhej të vije mënjanë dijen, dëshirat e vizionin për t’iu nënshtruar padijes e arrogancës.
Së fundmi jeta private. Nuk po bëj pyetjet klishe ke apo s’ke të dashur, por fansat duan të dinë: A është Rudi i dashuruar?
Pa koment…
Burimi: Iconstyle
