Pas dy vitesh online, Panairi i Librit është rikthyer fizikisht.
Për pesë ditë, mbi 90 shtëpi botuese do të prezantojnë titujt e rinj dhe do të vendosin sërish komunikimin e drejtpërdrejtë më lexuesin.
Në këtë edicion po marrin pjesë shtëpi botuese nga Shqipëria, Kosova dhe treva të tjera shqiptare.
Për shkak të virusit ende të pranishëm në jetët tona, panairi nuk do të presë vizitorë nga ora 2 deri në orën 3 të drekës, për të vijuar sërish aktivitetin gjatë pasdites. Gjithashtu është e domosdoshme maska.
Panairi do të vazhdojë deri të dielën, ndërsa ditën e shtunë do të behët edhe ndarja e çmimeve për krijim më të mirë, përkthimin më të mirë e disa të tjera.
Edhe këtë edicion, njësoj si të mëparshmit nuk do të mungojnë shkrimtarët e huaj që do të vizitojnë panairin. Dita e parë nis me autoren greke Lili Mavrokefalou në stendën e Toenës, ndërsa evente të tjera premtohen në 5 ditë kremtim për librin.
Botuesi i shtëpisë botuese, “Onufri”, Bujar Hudhri i tha Deutsche Welles se ai e sheh këtë panair si kthim në normalitet të jetës, botuesve e shkrimtarëve.
“Fjala normale i shkon më shumë kësaj situate. Kemi kaluar kohë të vështira, si botuesit, si lexuesit, shkrimtarët, të gjithë. Këtu jemi për t’u takuar të gjithë, ky është gëzimi më i madh. Krijohet ajo atmosfera e munguar kaq kohë, një atmosferë që letërsia e krijon natyrshëm si kontakt mes lexuesit e shkrimtarit.”
