Rikthimi i Xavi-t i ka dhënë shpresë katalanësve. Ata po shpresojnë që skuadra, dikur shumë në formë të përmirësohet.
Xavi ka pasur një miqësi dhe bashkëpunim shumë të mirë me Dani Alves, i cili u prezantua sot në Camp Nou pas zyrtarizimit të rikthimit të tij të befasishëm te Barcelona, ku do të luajë nën urdhrat e ish-shokut të skuadrës Xavi.
38-vjeçari ka fituar 6 tituj kampion te kjo skuadër dhe 3 Champions League, duke qenë një prej lojtarëve më të rëndësishëm të epokës së trajnerit Guardiola.
Detaji që ra në sy gjatë prezantimit të tij për rikthimin ishte fakti që edhe pse i veshur me kostum, mbrojtësi brazilian zbriti në fushë me shapka me gusht, njëlloj siç kishte bërë 13 vite më parë gjatë prezantimit të vitit 2008.
Më pas ai shkeli zbathur në fushë dhe këputi disa fije bari. “Mbajnë era Camp Nou, mbajnë era trofe e kupa”, tha ai.
Alves, i cili pasi u largua nga Barcelona luajti për disa klube të rëndësishme, si Juventus dhe Paris SG, shpjegoi edhe veshjen e shapkave.
“Disa gjëra nuk ndryshojnë asnjëherë”, tha ai. “Është kënaqësi të jesh këtu, është një nder që rikthehem. Kam ardhur për të bërë gjëra të mëdha, sepse ky klub është ndërtuar pikërisht për këtë arsye”.
Më parë, Alves ka mbajtur numrin 22 te Barcelona, por këtë herë klubi vendosi t’i japë numrin 8. Para se të firmoste me katalanasit, braziliani luante në vendlindje me Sao Paulon.
