Mbrëmjen e të shtunës 4 pjesëtarë të Aleancës për Mbrojtjen e Teatrit, Astrit Seranaj, Donald Martini, Gentian Hasani dhe Ergys Mërtiri u shoqëruan në komisariatin nr.1, sepse tentuan të bënin një lidhje live para sheshit të teatrit. Ata u shoqëruan me forcë dhe sipas tyre policia ka ushtruar edhe dhunë psikologjike e fizike.
Në një deklaratë të Aleancës për Mbrojtjen e Teatrit, thuhet se efektivët e policisë kanë qëlluar me grushta në fytyrë Astrit Seranaj dhe koreografin Donald Martini. Gjithashtu thuhet se policët kanë zhdukur provat nga celulari i sociologut Ergys Mërtiri.
Më pas Aleanca paralajmëroi se do të organizonte protestë para Ministrisë së Brendshme për:
1.Marrjen a masave nga Policia e Shtetit ndaj efektivëve që ushtruan dhunën pa motiv, shkarkimin dhe procedimin penal të tyre.
2.Shkarkimin dhe procedimin penal të Drejtorit të Përgjithshëm të Policisë së Shtetit Z.Ardi Veliu.
3. Ristrukturimin e Policisë së Shtetit që ajo ti rikthehet qytetarëve.
Kështu, pasditen e sotme aktivistët e Aleancës për Mbrojtjen e Teatrit kanë organizuar një protestë para ministrisë së Brendshme, ashtu siç e kishin paralajmëruar.
Protesta e tyre vjen për shoqërimin me dhunë për 4 aktivistët nga Policia e Shtetit në komisariat. Aktivistët kërkuan dorëheqjen e kreut të Policisë së Shtetit, Ardi Veliu, sakaq bëjnë me dije se protestën do e vazhdojnë në ditët e ardhshme. Ndërkohë aktivistja Adriana Kalaja, në një intervistë për Oranews është shprehur se protesta është paqësore, duke shtuar se ngjarja e së shtunës është e stisur.
“Kjo është një protestë paqësore. Po ashtu kemi filluar edhe betejën tonë ligjore. Ngjarja e fundit e ditës së shtunë, që sipas nesh ishte e stisur, tregon se këta nuk kanë ndërmend që të krijojnë një klimë qetësie mes policisë dhe qytetarëve. Është shkelur parimi mbi të cilin është ngritur policia për mbrojtjen e qytetarëve. Ne gjithë kohës kemi parë një polici të dhunshme.”- tha ajo
