Ricky Martin thotë se po bën “la vida loca” pas martesës. Këngëtari, i cili do të vijë këtë muaj si aktor në filmin “The Assassination of Gianni Versace”, tha se është martuar me Jwan Yosef.
“Jam një bashkëshort tani, e në muajt e ardhshëm do të organizojmë një ceremoni të madhe. Kemi shkëmbyer betimet tona dhe kemi nënshkruar të gjitha letrat që është dashur të nënshkruajmë”, ka thënë Ricky Martin.
Në një intervistë ai ka treguar me sinqeritet marrëdhënien e djemve të tij binjak Matteo e Valentino me partnerin Jwan Yosef.
“Shumë njerëz më thonë se fëmijët e mi dhe ne jemi në kopertinat e të gjitha revistave e unë shprehem se dua që familja jonë të shihet si normale. Dua që njerëzit të shohin një familje e të thonë se nuk ka asgjë të keqe”, ka thënë Martin duke treguar se ky është misioni i tij.
Më pas këngëtari ka vazhduar të tregojë për fëmijët e tij, të cilët e pyesin se pse kanë dy baballarë.
“Ne jemi një familje moderne dhe kjo është një ndjenjë e bukur lirie”, është përgjigja që Martin u jep binjakëve 9-vjeçarë.
Ai dëshiron që familja e tyre të zgjerohet dhe kërkon të ketë edhe 4 çifte binjakësh të tjerë, por në këto momente është e pamundur për shkak të angazhimeve të tjera.
Burimi: USA Today
