Teksa verës po i vjen fundit, dilema “çfarë të vesh”, mbetet ende një ndër shqetësimet kryesore, veçanërisht për vajzat. Bashkë me ndryshimin e stinëve fillon edhe ndryshimi i gardërobës. Çfarë nuk duhet të mungojë në gardërobën e një femre?
Stilistja Rezarta Skifteri, në një intervistë për “ICONstyle”, tregon se për t’u veshur me stil nuk ka rëndësi vlera apo çmimi i veshjes. Sipas saj, në gardërobën e një femre, jo vetëm në vjeshtë, por në çdo stinë, e një rendësie të veçantë janë aksesorët e veshjes, këpuca, çanta apo syzet. Rezarta jep edhe një këshillë për t’u veshur me stil për femrat me trupa elegantë dhe ato të mbushura.
Intervista e plotë me stilisten Rezarta Skifteri:
Ju jeni një stiliste mjaft e njohur në Shqipëri dhe keni kohë që merreni me stilim veshjesh. Nga kjo periudhë që keni pasur mundësi të merreni me shumë klientë, çfarë mund të na thoni për guston e shqiptarëve. A vishen mirë? A kanë ata një stil apo mundohet të “vjedhin” diku?
Sigurisht që njerëzit kanë shije nga më të ndryshmet. Si në çdo vend tjetër edhe në Shqipëri, ka njerëz me shije, ka dhe pa shije. Nuk ka rëndësi vlera dhe çmimi i veshjes për të pasur një veshje me gusto. Ka njerëz që e kanë nuhatjen shumë të mirë.
Në atelier njerëzit vijnë për një mendim më profesional. Pra ata zgjedhin të vijnë te ty apo diku tjetër sepse i besojnë dhe e pëlqejnë stilin tënd. Në atelie nga “A” deri te “Zh”- ja është stilisti që hedh idetë në skica, zgjedh materialet dhe ndjek punën në çdo proces.
Çfarë bën Rezarta Skifteri kur nuk i pëlqen ideja e klientit të saj? Mundohesh t’ia ndryshosh mendjen? Apo bën atë që ai/ajo do…
Kjo nuk ndodh sepse klientët që vijnë në atelie, vijnë sepse pëlqejnë stilin dhe idetë e Rezartës, dhe besojnë te Rezarta duke e lënë në dorën time. Ndaj të gjithë ata që vijnë mbeten të kënaqur sepse unë punoj me pasion, dashuri e përkushtim. Çdo gjë që bëhet me përkushtim, normalisht dhe rezultatin e jep në fund.
Një pjesë e konsiderueshme e klientëve të mi jetojnë jashtë. Dhe shpesh ndodh që nuk vijnë dot në çdo rast që u duhet veshje. Ndaj ata as e kanë idenë dhe nuk e shohin çfarë do t’u realizoj. Por më pas ata me sjellin foto e mesazhe falënderimi dhe si kanë shkëlqyer nëpër eventet përkatëse.
Çfarë u këshilloni vajzave te reja të veshin në fundjavë nëse kanë një festë? Nëse mund të thoni një model të preferuar tuajin apo një stil, duke filluar nga veshja, këpucët, çanta, makijazhi dhe flokët…
Në gardërobën e një femre, jo vetëm në vjeshtë, por në çdo stinë, për mua një rendësi të veçantë kanë aksesorët e veshjes, këpuca dhe çanta.
Veshja mund të ndryshohet. Të gjithë e dimë, p.sh një bluzë, mund ta mbash me pantallona të një stili apo të një tjetri, apo me funde të stileve të ndryshme. Janë këpucët, çanta, syzet ato që i japin vlerë veshjes. Pra aksesorët.
Cilat janë ngjyrat e preferuara për këtë sezon veror dhe tendencat e tij duke filluar nga fustanet, sandalet dhe aksesorët…
Dhe pak ditë dhe stina e verës po i lë vendin vjeshtës por tendencat këtë verë ishin shumë interesante.
Kombinimi i të kuqes me ngjyrën blu kobalt, veshjet me viza në stilin marinar. Nuk kanë munguar fustane rrjete apo detaje të tjera të marra nga mjetet e peshkatarit, litari rrjeta pra. Ndërsa shumë tesuto kanë pasur si dizajn peshq e yje deti, etj.. përsëri nga plazhi e peshkimi.
Fustanet e gjatë e të lirshëm me një shpatull jashtë, papuçet e dekoruara kanë zëvendësuar sandalen chik. Rroba banjot me shtat të lartë, në kombinimet me viza. Shumë ngjyra, materiale të pambukta, bizhu të mëdha etj, kanë mbizotëruar këtë verë.
Vjeshta po afron, çfarë nuk duhet të mungojë në gardërobën e një femre?
Një tjetër element që unë e mbaj shumë në gardërobën time dhe që në veshjen e vjeshtës e konsideroj, janë xhemeli (bluze dhe triko apo kanotiere dhe triko, pra kompletet), apo thjesht triko, që për trupat elegante është shumë bukur të jetë fit (pas trupit) , apo për trupa më të mbushur shkojnë stilet e lirshme që tregojnë më elegancë.
Në periudhën e vjeshtës mund ta mbash në çante një triko të tillë dhe në një orë të ditës kur freskohet mund të mbash atë duke marre një imazh apo pamje tjetër me elegante dhe në përshtatje me motin.
Burimi: ICONstyle
*Shfleto galerinë
