Kur themi “Charlie Hebdo” të gjithë kujtojmë ngjarjen tragjike të ndodhur në janar të 2015-s, sulmin terrorist që la të vdekur 11 persona. Por duket se drejtuesit e revistës satirike franceze kanë lënë mënjanë historinë e dhimbshme, pasi nga 1 dhjetori vendosën që ta botojnë edhe në versionin gjerman.
Numri i parë i revistës do të dalë në tirazhin prej 200 mijë kopjesh. Veç përmbajtjes që do të përkthehet nga gjuha franceze në atë gjermane, redaktorët thonë se do të punohet diçka ekskluzivisht mbi realitetin gjerman dhe do të bashkëpunojnë me karikaturistët e dizajnuesit gjermanë. Me një çmim prej 4 dollarë, revista do të jetë në dispozicion kudo në Gjermani, për të cilën janë përkushtuar një numër prej pesë përkthyesish.
“Charlie Hebdo” ka përzgjedhur Gjermaninë pasi ka pasur shitjen më të mirë pas sulmeve që ndodhën në redaksinë e saj.
Rreth 1 mijë kopje të “Charlie Hebdo” shiten çdo javë në Gjermani. Në Francë, “Charlie Hebdo” shitet në rreth 60 mijë kopje në kioska dhe rreth 50 mijë kopje me abonim.
Burimi: The Guardian
