Reperi amerikan Lil Peep ka ndërruar jetë në moshën 21-vjeçare. Shkak i kësaj vdekjeje të papritur ishte mbidoza nga droga. Lajmin e ndarjes nga jeta e bëri të ditur menaxheri i tij Adam Grandmaison.
“Peep u dërgua menjëherë në spital, por fatkeqësisht ishte e pamundur për ta shpëtuar”: tha menaxheri i tij për mediat.
Emri i vërtetë i tij është Gustav Ahr. Ai publikoi albumin e tij të parë në gusht të këtij viti. Lil Peep njihet për këngët “Benz Truck” dhe “Awful Things, por edhe për betejën që kishte me depresionin dhe përdorimin e drogës.
Ai ishte cilësuar nga kritikët si një yll në ngjitje, të cilin e priste përpara një karrierë shumë e ndritur, por Peep zgjodhi një tjetër rrugë.
Menjëherë pasi u morr vesh lajmi i vdekjes se tij, muzikantë të ndryshëm kanë reaguar duke shprehur ngushëllimet e tyre.
“Peep kishte shumë gjëra për të bërë dhe vazhdimisht po më inspironte. Ndihem keq për të “: tha DJ dhe producenti muzikor, Diplo.
“Peep ishte njeriu më i këndshëm. Të dilje me të, të flisje me të për muzikë, idetë për këngët dhe turet që kishim ndërmend së bashku ishin të mrekullueshme. Do t”u mungosh të gjithëve”: shkruajti producenti holandez i muzikës Marshmello.
Pak orë përpara se të vdiste, 21-vjeçari kishte postuar një video ku shkruante: “Unë jam mirë, nuk jam i sëmurë”. Ndërsa në një postim një ditë më parë se të vdiste Peep shkruajti: “Kur të vdes do të më doni”.
