Ditën e sotme është shënuar viktima e parë nga zjarret në Shqipëri. Një burrë 64-vjeçar që banonte në fshatin Asim Zeneli në Gjirokastër ka humbur jetën pasi zjarri i është afruar banesës së tij. Është mësuar se i ndjeri është përpjekur të shuajë zjarrin dhe për këtë arsye ka humbur jetën. Ndërsa bashkëshortja e tij 57 vjeç është dërguar në spitalin rajonal të Gjirokastrës.
“Rreth orës 17:00, njoftohemi se në fshatin “Asim Zeneli”, në bahçen në afëri banesës së tij, shtetasi A. H., rreth 64 vjeç, ka humbur jetën, si pasojë e flakëve të përhapura nga një vatër zjarri në fshatin “Asim Zeneli”.
Gjithashtu ka mbetur e dëmtuar nga flakët dhe bashkëshortja e tij, shtetasia T. H., rreth 57 vjeçe, e cila ndodhet në Spitalin Rajonal Gjirokastër.
Në vendngjarje kanë shkuar shërbimet e Policisë dhe zjarrfikëse.
Grupi hetimor nën drejtimin e Prokurorisë Pranë Gjykatës së Rrethit Gjyqësor Gjirokastër ndodhen në vendngjarje dhe vijojnë punën për zbardhjen e rrethanave të ngjarjes”, thuhet në njoftimin e policisë.
Situata në njësinë administrative Lunxhëri-Antigone është agravuar orët e fundit dhe zjareri ju është afruar banesave. Ministri i Mbrojtjes Niko Peleshi ju ka bërë thirrje banorëve të zonës që të respektojnë urdhrin e autoriteve për evakuim.
“Në Bashkinë Gjirokastër, është shfaqur një tjetër vatër zjarri e rrezikshme në Njësine Administrative Lunxhëri – Antigone, ku si pasojë e erës situata eshte agravuar dhe zjarri është shume prane banesave. Në vendngjarje po punojne strukturat e mbrojtjes civile. Gjithashtu ne mbeshtetje kanë shkuar edhe Forcat e Armatosura. U bejme thirrje banoreve te jeme bashkepunues me strukturat shteterore per te zbatuar urdherin e evakuimit”, shkruan Peleshi në Facebook.
