Është përshkallëzuar situata me koronavirusin në institucionet arsimore, pasi vetëm në qarkun e Lezhës janë infektuar me koronavirus 17 mësues dhe 7 nxënës që nga fillimi i procesit mësimor.
Ndërkohë, 37 mësues dhe 14 nxënës janë të karantinuar në shtëpi me dyshimin se po ashtu janë të prekur nga Covid 19.
Situata absurde vijon me faktin që deri tani, asnjë klasë nuk është mbyllur për shkak të infektimit të stafit apo nxënësve. Mësimi vijon të zhvillohet duke rrezikuar kështu shëndetin e të tjerëve.
Gjithashtu, të paktën 10 mësues dhe 11 nxënës në 5 institucione arsimore në qarkun Dibër janë të infektuar me Covid-19. Mësuesit e prekur nga koronavirusi janë zëvendësuar dhe është lejuar vijimi i procesit mësimor.
Raste të mësuesve dhe nxënësve të prekur me koronavirus janë raportuar thuajse në të gjitha bashkitë e vendit. Por rastet kur mësimi në klasa është pezulluar për të vijuar online kanë qenë të pakta.
Shkolla e parë e mbyllur për shkak të koronavirusit ka qenë në Përmet, ku pas konstatimit të 6 rasteve me virus, drejtoria u detyrua të mbyllë shkollën dhe të dërgojë nxënësit në shtëpi.
Tirana me numrin më të lartë të mësuesve të infektuar
Deri më 29 shtator, numri i mësuesve të infektuar kishte shkuar në 80, ndërsa ai i fëmijëve në 40,të paktën sipas informacioneve nga drejtoria arsimore.
Tirana mban numrin më të lartë të mësuesve dhe nxënësve të karantinuar, por deri tani asnjë klasë nuk është mbyllur për shkak të infektimit të stafit apo nxënësve.
Mësimi vijon normalisht në këto institucione, ndërkohë që mësuesit e infektuar janë zëvendësuar me të tjerë. Deri më tani nuk dihet asgjë për kontatet e këtyre mësuesve, nëse u është bërë tamponi apo janë karantinuar.
Drejtoria e Përgjithshme e Arsimit Parauniversitar sqaron se ka afro 1600 mësues në dispozicion për të zëvendësuar ata që do të preken nga Covid-19, por problemi nuk është ky!
Shumica e prindërve thonë se nuk janë në dijeni të rasteve dhe kërkojnë përforcim të masave.
/Iconstyle.al
