Protesta që po zhvillohet ditëve të fundit kundër rritjes së çmimeve ka ndihmuar për të reflektuar gjendjen që ndodhet standardi i jetesës në shoqërinë shqiptare. Lindja e këtyre protestave nuk ka shfaqur vetëm fytyrën e vërtetë të qeverisë, por edhe gjendjen në tërësi të shoqërisë.
Kjo revoltë qytetare, e cila ka përfshirë shumicën e qyteteve në Shqipëri, ka bërë që shumë të rinj e të vjetër të përdorin slogane dhe fjalën e tyre për të treguar zemërimin me situatën aktuale të vendit tonë, që përballet me korrupsionin, padrejtësitë dhe diskriminimin.
Një qytetar i cili ndodhet në përpjekje për të zgjidhur një problem të caktuar, dhe has në çdo hap barrierat e ngritura padrejtësisht kundër tij nga gjyqtarë e zyrtarë të tjerë të korruptuar të sistemit të drejtësisë, padyshim që demoralizohet nga i ashtuquajturi “shtet ligjor” dhe, pse jo, përgatitet që në të ardhmen të fitojë të drejtat e tij nëpërmjet një arme: protestave!
Padyshim që gama e fushave ku korrupsioni godet dhe dobëson bazamentet e shtetit ligjor, e jetës ekonomike dhe të demokracisë së brishtë të vendit tonë, është e gjerë: arsim, shëndetësi, politikë, sport etj., por pasoja më e rëndë që korrupsioni shkakton është pikërisht dëshpërimi dhe humbja e shpresës.
Beteja e nisur për uljen e çmimeve, ka ngjizur një filiz shprese për shqiptarët. Kjo kundërshti e furishme sa vjen e intensifikohet. Nuk është më thjesht një protestë për çmimet, qytetarët duan të zhbëjnë padrejtësitë.
