Ditën e djeshme bëri bujë lajmi se supermodelja izraelite Bar Refaeli është dënuar për evazion fiskal nga Gjykata e Tel Aviv dhe do duhet të kryejë 9 muaj shërbim social, pas deklaratave të rreme në lidhje me vendbanimin e saj, për të evituar taksimin e të ardhurave. 30-vjeçarjaka fshehur përfitimin e një shume prej mbi 500.000 paundësh, në formën e një apartamenti luksoz të regjistruar në emër të së ëmës dhe vëllezërve të saj.
Shumë nga ju mund të pyesin se ku është pjesa për tu habitur këtu, pasi raste të tilla janë të shumta në showbizin ndërkombëtar. Padyshim. Jo vetëm në botën rozë, por evazioni fiskal dënohet rëndë nga çdo shkelës, qofshin këta individ, e aq më tepër sipërmarrje. Këtu flasim për vendet e zhvilluar. Sepse në vendet në zhvillim siç është Shqipëria çdo vit, qindra miliardë euro evazion fiskal shkojnë nëpër parajsat fiskale.
Në dy dekadat e fundit, pabarazia e të ardhurave po rritet gjithmonë e më tepër. Të pasurit paguajnë gjithmonë e më pak në raport me fitimet e tyre e të varfrit janë të “dënuar” t’iu ngelen gjithmonë e më pak para për konsum. Për ta konkretizuar shqetësimin tonë, nëse Vodafone Albania ka lajmëruar se do të bëjë një investim prej 500 milionë eurosh në infrastrukturën e rrjetit, pasi ka hyrë në tregun e telefonisë dhe internetit fiks, duke blerë aksionet e Abcom, atëherë pse deklaron humbje?
Së pari, kompania ka zgjeruar aktivitetin e saj me blerjen e operatorit fiks, ndërkohë që nuk po bën asgjë për t’i faturuar më pak klientët e vet.
Së dyti, ajo që të bën të reflektosh është fakti që, si ka mundësi që po investohet një shumë e majme në infrastrukturën e rrjetit, në një kohë që Vodafone (një nga operatorët me të ardhurat më të mëdha dhe qarkullim vjetor prej 16.3 miliardë lekësh, sipas të dhënave nga Monitor viti 2018), ka thelluar humbjet në vitet e fundit.
Rrjedhimisht lind dyshimi nëse thellimi dhe deklarimi i humbjeve, lidhet ose jo me mospagimin e taksave!
Monitor shkruan se: “Ulja e fitimit erdhi pasi kompania ka shënuar rritje më të shpejtë të kostos së shitjes dhe shërbimeve dhe shpenzimeve të tjera, ndërsa të ardhurat ranë me 3.4%”.
Por nëse Vodafone Albania do që të investojë në tregun shqiptar 500 milionë euro, më e pakta që mund të bëjë është të jetë transparent me investimet, të përcaktojë qartazi kategoritë se ku do të investojë, që nga investimet në infrastrukturën e rrjetit e deri te reklamat, apo burimet njerëzore.
Shqiptarët kanë vite që presin një lloj shërbimi ose përfitimi më të mirë si përgjigje për paratë që paguajnë, por mbajnë në kurriz vetëm korrupsion dhe gënjeshtra.
Adam Smith më shumë se dy shekuj më parë do të vinte në dukje: “Atje ku të paktën ka një dyshim të zakonshëm për shumë shpenzime jo të domosdoshme dhe keqzbatim të shpenzimeve publike, legjislacioni që e ruan atë respektohet pak.“.
