Ilir Meta ka rrëfyer dje në mbledhjen e Komitetit Drejtues Kombëtar të LSI-së, sesi ka reaguar familja e tij kur mori lajmin se u zgjodh president i vendit.
Ai foli për reagimin e vajzës së tij, Erës, e cila është shfaqur shpesh në krah të të atit për t’i dhënë mbështetjen e saj. Meta është shprehur se në atë kohë ajo ndodhej në SHBA, në dasmën e një të afërmi dhe në momentin kur ka zbritur nga avioni, ka marrë mesazhe urimi nga miqtë e saj.
Fill pas kësaj, Era ka telefonuar Elona Gurin, e cila është një nga themelueset e LSI dhe njeriu më i afërt i familjes Meta, si në politikë ashtu edhe në jetë pasi është një mikeshë e mirë e Monikës. Shqetësimi i Erës nuk ka qenë fakti nëse babai do të zgjidhej president apo jo, por çfarë do të ndodhte me LSI-në.
“Ajo ishte në Amerikë, në dasmën e kushëririt të saj dhe nuk e dinte se çfarë po ndodhte këtu. Në rrugën e kthimit kishte marrë mesazhe pa fund nga mikeshat e saj, të cilat i uronin emërimin tim si president. Menjëherë mori në telefon Elona Gurin dhe pyeti çfarë po ndodh. “Shefi do të bëhet president”,- i tha. “Po lëre moj presidentin, me LSI-në ç’do bëhet?”- është shprehur, sipas Metës, vajza e tij.
Ky reagim ka shkaktuar jo pak të qeshura te të pranishmit, pasi duket se Era është shumë e dhënë dhe e lidhur pas babait dhe e ka ndjekur çdo hap të rrugëtimit të tij në politikë.
