Aktivistët dhe studiuesit e skllavërisë e kanë kritikuar monarkinë britanike pasi Mbreti Charles pozoi me personalitete të Karaibeve në një pritje nën një portret të George IV, i cili e bëri pasurinë e tij nga puna e skllevërve në plantacionet në Grenada. Charles priti një mori banorësh të ishujve të Karaibeve në Pallatin e Shën Jakobit më 10 mars për pritjen vjetore të Komonuelthit. Ministrat e jashtëm të Xhamajkës, Shën Kitsit dhe Nevisit dhe Trinidadit dhe Tobagos ishin midis të pranishmëve.
Komisioneri i Lartë i Grenadës në Britani, Rusher Croney, ishte gjithashtu i ftuar.
Një grup prej 29 të ftuarish pozuan për një foto me Charlesin dhe Sekretaren e Jashtme Britanike Yvette Cooper nën një portret të madh të Mbretit George IV. Fotografia u shpërnda më pas në disa llogari të Karaibeve në internet.
Një hulumtim nga studiuesja e pavarur Desiree Baptiste, i raportuar nga Reuters vitin e kaluar, zbuloi se rreth 1,000 £ (rreth 103,000 £ në paratë e sotme) u paguan në thesarin privat të George IV nga dy plantacione në pronësi të Kurorës në Grenada, ku punonin qindra skllevër, në shekujt 18 dhe 19.
Ekspertët thonë se zbulimet po rrisin presionin mbi monarkinë për t’u përballur me lidhjet e saj historike me skllavërinë, për të kërkuar falje dhe për të pranuar se si ka përfituar prej saj.
“Është fyese që portreti i tij të shfaqet”, tha Arleigh Gill, kryetar i Komisionit Kombëtar të Dëmshpërblimeve të Grenadës. “Është dyfish fyese të vendosësh njerëz me prejardhje afrikane me mbretin, nën një fotografi të tij. Thjesht po hidhni kripë në plagë”, tha ai.
Gill tha se fotografia ishte gjithashtu një mundësi për disa përfaqësues të Karaibeve për të mësuar më shumë rreth historisë së skllavërisë.
Pallati i Buckinghamit nuk iu përgjigj menjëherë një kërkese për koment.
Batiste e quajti foton një “gabim diplomatik” nga pallati dhe i kërkoi Çarlsit të “thellonte” njohuritë e tij për përfshirjen e monarkisë në skllavëri.
Robert Beckford, një profesor britanik i teologjisë me origjinë xhamajkane, tha se “fotoja familjare” ishte një akt “amnezie historike”.
“Qëndrimi nën portretet mbretërore legjitimon harresën”, komentoi ai.
Charles kishte shprehur hidhërimin e tij për skllavërinë në një fjalim të vitit 2022 para udhëheqësve të Komonuelthit. Një hetim i Guardian në vitin 2023 zbuloi se Mbreti William III (1689-1802) mori një pjesë prej 1,000 £ nga Kompania Mbretërore Afrikane, e cila transportoi mijëra afrikanë të skllavëruar në Amerikë.
