Kryeministri Edi Rama përmes një konference bëri të ditur disa nga vendimet që ka marrë qeveria, lidhur me kërkesat e studentëve.
Rama tregoi se janë miratuar katër vendime lidhur me kërkesën e parë për uljen e tarifës dhe kategoritë e studentëve që përfitojnë bursa.
“Së pari kemi studentët më familje më ndihmë ekonomike, të verbrit, ata me aftësi të veçanta që do marrin financimin e plotë të tarifës dhe po ashtu studentë nga familje me ndihmë ekonomike që do përfitojnë një bursë studimi prej 10 mijë lekësh të reja.
Së dyti studentët me notë mesatare mbi 9 në çdo Universitet do përfitojnë nga qeveria 100% të tarifës nga tarifa e plotë që paguanin para këtij vendimi. Për çdo bursë studimi do përfitojnë 10- mijë lekë të reja.
Së treti, do t’i japim një mundësi të barabartë të gjithë studentëve, duke paguar 50% tarifë regjistrimi drejtpërdrejt nga buxheti, të cilët deri para këtij vendimi paguanin tarifën e plotë. Do të thotë se një student aktual për pjesën e mbetur të këtij vitit akademik, edhe ata me notë 4 dhe me 5, do paguajë buxheti i shtetit për ta. Studentët e tjerë që nuk përfshihen në kategoritë e përmendura dhe që janë me mesatare 6 e lartë nuk do kenë lehtësira.
Për sa i përket masterit, qeveria do të paguajë vetëm për studentët me notë mesatare mbi 9, ata me ndihmë ekonomike, fëmijë të policëve dhe ata me aftësi të kufizuara. Qeveria do të paguajë 50%”, u shpreh Rama.
Ky vendim hyn në fuqi nga sot, që do të thotë se në janar do t’i mbulojë qeveria.
Një tjetër kërkesë për të cilën është marrë një vendim, lidhet me konviktet.
“Me aktin normativ të buxhetit janë 3 milionë dollarë shtesë për konviktet”, tha kryeministri.
Për kërkesën e transparencës në institucionet e arsimit të lartë, kryeministri Rama u shpreh:
“Do të krijohet struktura për kontrollin e transparencës për arsimin e lartë dhe trajtimit të këtyre ankesave. Afati i realizimit është muaji prill i vitit 2019”.
Gjithashtu ai shtoi se do të krijohet një arkiv dixhital për të shmangur plagjiaturën e doktoraturave.
Studentët protestuan për 18 ditë rresht, duke lajmëruar se protestat do të rinisin sërish në 2019-n deri në realizimin e të tetë kërkesave të tyre.
Burimi: Gazetareforma
