Kryeministri Rama u ka dhënë një mesazh të fortë të gjithë të rinjve që thyejnë rregullat dhe dalin nga shtëpia.
Nga rrjeti social Facebook kreu i qeverisë u ka kërkuar qytetarëve të vijojnë të qendrojnë brenda pasi rrezikojnë jetën e tyre.
Kryeministri Rama tha se 40 për qind e të prekurve nga koronavirusi në SHBA janë mes moshës 20 dhe 40 vjeç dhe shumë prej tyre janë në gjendje të rëndë.
“Edhe unë në shtëpi sot dhe më vjen të qesh se ajo puseta e hapur dixhitale që kishte përhapur fjalën nuk shkoj në zyrë nga frika. Unë kam qenë i detyruar të shkoj në zyrë se ma ka dashur puna, por trimëria është të rezistosh mos të dalësh. Mbrëmë shifrat e të prekurve në SHBA ishin të frikshme për rininë.
40 % e të shtruarve janë nga 20-45 vjeç dhe jo pak prej tyre në gjendje të rëndë. Është e vërtetë që ky armik merr në botën tjetër përgjithësisht ata që janë më të moshuar të dobët, por është e pavërtetë që të rinjtë janë të paprekshëm, madje edhe fëmijët nuk janë 100% të paprekshëm.
Sot në Izrael luftohet për jetën e një fëmije 9-vjeçar. I lutem atyre që luajnë mes orës 4-6 të mos dalin nga shtëpia, se mund të transportojnë bombat dhe të vrasin mos e dhënë kurrë zoti, prindërit dhe gjyshërit, por mund të humbasin edhe jetën e tyre”, tha Rama.
Rama shtoi se kompanitë telefonike do të ofrojnë paketa interneti me 50 për qind ulje në 5 javët në vijim!
“Ofertat do të jenë të vlefshme nga nesër dhe deri në fund të muajit prill 2020. 50% më shumë internet falas për një periudhë 5 javore, akses flas në internet në çdo platformë edukative përfshirë RTSH kanalin që mbulon shkollën. Mundësi për abonentë me kontratë të fiksit për të pasur akses në platforma edukative interaktive për fëmijë të çdo moshe 60% më lirë krahasimisht me ofertën normale”, tha Rama.
