Presidenti i Turqisë Rexhep Tajip Erdogan është kujdesur personalisht që operacioni i efektives Ina Nuka në Turqi të shkonte me sukses.
Lajmin e dha vetë kreu i qeverisë shqiptare, Edi Rama në një takim me efektiven këtë të diel, pas kthimit të saj nga Turqia.
“U kujdes Presidenti personalisht atje, Erdogan. Ata praktikisht ishin shumë të shqetësuar, pa ditur gjë thanë se nuk është problem. Pastaj, kur morën të gjitha të dhënat, ata u futën në panik dhe faktikisht ju ra optimizmi. Nga ana tjetër, patën edhe shtysën nga ne dhe nga Presidenti i vet dhe e morën atë risk me shumë sukses”.
Rama u shpreh se do të ketë edhe një shpërblim financiar nga qeveria për efektiven e plagosur me kapsollë në protestën e banorëve të Astirit.
“Ne jemi shumë krenar për ty. Fola dhe me ministrin për një vendim qeverie për të dhënë një mbështetje financiare dhe morale që të kesh ndjesinë e plotë të solidaritetit dhe mundësinë që të rikuperohesh tërësisht dhe pastaj të integrohesh. Do të fillosh edhe punën me një detyrë më të lehtë si fillim”.
Ina Nuka mbeti e plagosur mesditën e 22 nëntorit gjatë një protesta para parlamentit nga banorët e Astirit në Tiranë, që kundërshtojnë projektin për shembjen e ndërtesave të tyre. Ndërkohë 18-vjeçari që hodhi kapsollën në drejtim të saj vijon të jetë I arrestuar.
