Në një konferencë për mediat së bashku me ministren e Shëndetësisë Ogerta Manastirliu, kryeministri Rama paraqiti masat anti-COVID të marra nga qeveria me qëllim përballimin e sfidës vjeshtë- dimër me të cilën po përballet e gjithë bota.
Sipas Ramës, vendosja e maskës do të jetë me detyrim në çdo ambient, të brendshëm apo të jashtëm dhe masa ndëshkimore në formë gjobe do t’i vijë çdo qytetari bashkë me faturën e dritave.
“Duhet t’i qëndrojmë strikt rregullit të ri që do të vendosim sot, nëse nuk duam të rimbyllemi.
Një mbyllje e përgjithshme nuk do të kursejë askënd. Më mirë sot të hedhim një hap tjetër dhe të jemi solidarë sesa nesër të gjendemi brenda mureve dhe të shikojmë rihapjen e kanalit prej nga do të rrjedhin të ardhurat e familjes.
Edhe falja e gjobave që bëmë dhe mungesa e kontrolleve në ambientet e brendshme duhet parë si përpjekje për të mirëkuptuar stresin e bizneseve dhe natyrisht që është në vetëdijen e çdo qytetari, pronari të hapësirave të brendshëm të bëjë punën e vet pa pasur nevojë për masa represive, por fatkeqësisht një pjesë s’e kanë kuptuar kështu dhe ja kanë hedhur vetes dhe familjes së tyre dhe shoqërisë, duke mos bërë gjërat elementare, vendosjen e maskën në ambientet e mbyllura.
Maska nuk ka qenë as këtu dhe as në shumë vende e detyrueshme jashtë, nuk është konsideruar as e domosdoshme. Nga java e ardhme maska do të jetë e detyrueshme kudo, përveç shtëpisë.
Masa ndëshkimore do të zbatohet tek të gjithë, dhe do të paguhet tek fatura e dritave. Kështu s’do ketë asnjë individ që t’i shmanget gjobës.
Gjoba duhet të jetë e fundit, nuk duhet të jetë gjoba arsyeja pse njerëzit duhet të vënë maska, por ekonomia e familjes së tyre dhe shëndeti.
Implementimin e kësaj mase do ta bëjë policia e shtetit dhe ajo bashkiake, nuk do përdorim inspektorë”- u shpreh kryeministri.
Gjithashtu, ai kërkoi ndërgjegjësim nga qytetarët për të parandaluar një karantinë të dytë, drejt të cilës po shkojnë shumë vende.
“Ishte parashikuar që me ardhjen e vjeshtës numrat do të fillonin të rriteshin, por ndërsa në disa vende po rikthehen masat shtrënguese dhe po rishfaqet kërcënimi i një karantine të përgjithshme ajo që ne duhet me çdo kusht të përpiqemi dhe të parandalojmë është një karantinë e përgjithshme.
Një karantinë e përgjithshme e dytë do të ishte tejet e vështirë për vendin, ekonomitë e shumë familjeve dhe shtetin”, tha Rama.
https://www.facebook.com/138734771522/videos/2663651130616293/
